Zelensky dhe kryeministri i Indisë takohen ballë për ballë në samitin e G7, për herë të parë që kur Rusia nisi pushtimin e Ukrainës

Presidenti ukrainas Volodymyr Zelensky tha se e kishte ftuar Indinë t’i bashkohej nismës së formulës së paqes të Ukrainës gjatë bisedimeve të tij me kryeministrin Narendra Modi në margjinat e samitit të Grupit të Shtatë (G7) në Japoni.

Zelensky tha se të dy kishin diskutuar nevojën e Ukrainës për spitale të lëvizshme dhe heqjen e minave tokësore gjatë takimit të tyre të parë ballë për ballë që kur Rusia nisi pushtimin e Ukrainës në shkurt të vitit të kaluar, transmeton Telegrafi.

Modi i tha Zelensky-t se ishte i prirur të ndihmonte dhe tha se për të lufta ishte një çështje e njerëzimit dhe vlerave njerëzore.

“Ju siguroj se për zgjidhjen e saj India dhe unë personalisht do të bëjmë gjithçka brenda mundësive tona”, tha ai.

New Delhi dhe Moska kanë pasur një marrëdhënie të ngushtë për dekada dhe India ka refuzuar të dënojë Rusinë për luftën e saj në Ukrainë.

Ndërkohë tregtia e saj me Moskën është rritur në nivele rekord, e nxitur kryesisht nga rritja e importeve të saj të naftës ruse nga India, duke bërë që disa liderë perëndimorë të kritikojnë Indinë për lidhjet e saj të ngushta me Rusinë ndërsa përpiqen të izolojnë Moskën. /Telegrafi/