Zejnullahu flet hapur: Nuk dua të luaj me Kosovën

Mesfushori i talentuar kosovar, Eroll Zejnullahu si duket nuk do të grumbullohet më me Përfaqësuesen e Kosovës.

22-vjeçari është pjesë e skuadrës gjermane Union Berlin mirëpo këtë vit ka luajtur vetëm 126 minuta në shtatë ndeshje duke bërë dy asistime.

Ai është grumbulluar rregullisht nga Përfaqësuesja e Kosovës, por që nuk është aktivizuar fare në katër ndeshjet eliminatore.

Zejnullahu do të luaj titullar sot për Unionin, pasi Stephan Frustner ka kartonë të verdhë.

“Qëllimi im është të fitojmë kundër Bochum. Dua ta shfrytëzojë këtë mundësi për të bërë më shumë ndeshje”, deklaroi Zejnullahu për mediat gjermane.

Por ai i justifikon ndeshjet e pakta me Union Berlinit duke thënë se kjo ka ndodhur për shkak të Përfaqësueses së Kosovës që nuk është aktivizuar, transmeton Telegrafi.

Llapjani tani thotë se vështirë do t’i bashkohet Kosovës në ndeshjen e muajit mars ndaj Islandës.

“Unë jam i fokusuar vetëm tek Union. Nuk e di nëse do të shkoj në mars të luaj me Kosovën. Do të mendoj tri herë para se të udhëtoj”, deklaroi Zejnullahu.

“Nuk dua të shkoj të luaj me ekipin kombëtar të aktivizohem një minutë pastaj të humbas ndeshjet me Unionin. Së pari do të flas me trajnerin e Union Berlinit, Jens Keller dhe pastaj të vendosi”, përfundoi Zejnullahu. /Telegrafi/