LAJMI I FUNDIT:

Ymeri kërkon ndryshimin e Ligjit për pagat: Duhet të zvogëlohet hendeku

Ymeri kërkon ndryshimin e Ligjit për pagat: Duhet të zvogëlohet hendeku

Deputeti i Partisë Socialdemokrate, Visar Ymeri ka vlerësuar se grevat në arsim dhe shëndetësi kanë ardhur si rezultat i Ligjit për pagat.

Në një postim në rrjetin social, Ymeri ka kërkuar që Ligji për pagat të ndryshohet, në mënyrë që sipas tij, të zvogëlohet hendeku mes pagave.

Sipas tij, ligji aktual e rrit hendekun ndërmjet niveleve të ndryshme të pagave, në sektorin publik.

“Në këtë drejtim mendoj se ka dy mënyra se si mund t’i lexojmë këto greva: kërkesa për më shumë para (si pagë) nga shërbyesit civil, e veçanërisht nga këto dy kategori; ose, kërkesa për më shumë barazi (në të paguar) nga shërbyesit civil, e veçanërisht nga këto dy kategori. Për mua kjo e dyta është e vërtetë. Madje edhe nëse nuk është vërtetë kjo kërkesa e artikuluar e grevistëve”, ka shkruar Ymeri.

Postimi i plotë:

LIGJI PËR PAGAT DUHET NDRYSHUAR ASHTU QË TA ZVOGËLOJË HENDEKUN NË MES PAGAVE TË SEKTORIT PUBLIK

Greva në arsim dhe shëndetësi janë të lidhura me Ligjin për pagat në sektorin publik. Njëjtë edhe grevat tjera të paralajmëruara.

Në këtë drejtim mendoj se ka dy mënyra se si mund t’i lexojmë këto greva: kërkesa për më shumë para (si pagë) nga shërbyesit civil, e veçanërisht nga këto dy kategori; ose, kërkesa për më shumë barazi (në të paguar) nga shërbyesit civil, e veçanërisht nga këto dy kategori.

Për mua kjo e dyta është e vërtetë. Madje edhe nëse nuk është vërtetë kjo kërkesa e artikuluar e grevistëve.

Ligji për pagat, mes tjerash, e vazhdon të njëjtën logjikë të rritjes së hendekut mes niveleve të ndryshme të pagave brenda sektorit publik. Kjo logjikë ka qenë logjika institucionale për një kohë të gjatë, mendësi kjo qeverisëse që e përqendron pasurinë të shtresat e pakta në numër, por gjithsesi lartë në hierarkinë shoqërore, si dhe, kështu, e rritë hendekun mes të varfërve dhe të pasurve, duke e lënduar deri në zhbërje shtresën e mesme të shoqërisë.

Në këtë pikë, në këtë logjikë, ligji duhet ndryshuar. Dhe këtu vijnë në shprehje kërkesat greviste. Jo si thjeshtësi vullgare e shumës së pagës mujore, por si cilësi emancipuese për trajtim të barabartë e të drejtë të qytetarëve.

Ky është diskutimi i drejtë dhe i duhur publik për këtë çështje. Dhe duhet filluar nga këtu, nga institucionet publike. Duhet ulur koeficientin e propozuar për pagat e pozitave ekzekutive/përfaqësuese/këshilluese në institucionet publike duke filluar nga Presidenti, e duke vazhduar me Kryeministrin, ministrat, zëvendës-ministrat.

Është e domosdoshme që të zvogëlohet hendeku në rritje në mes të pagave në sektorin publik dhe rritja e pagave në sektorin privat. Kohezioni shoqëror arrihet vetëm përmes trajtimit më të drejtë dhe më të barabartë të të gjitha kategorive e shtresave shoqërore. /Telegrafi/