West Ham i kthehet fitoreve duke befasuar Chelsean (Video)

West Ham United ka fituar ndaj Chelseat me rezultat minimal 1-0 në ndeshjen e vlefshme për javën e 16-të të Ligës Premier.

Skuadra londineze i është kthyer fitoreve pas më shumë se pesë ndeshjeve në kampionat, pikërisht duke befasuar kampionin në fuqi të Ligës Premier, Chelsean.

Ndeshja nisi mirë që vendasit që shënuan shpejt duke treguar se kanë hyrë në ndeshje për të fituar.

Ishte sulmuesi austriak, Marko Arnautovic, i cili shënoi në minutën e gjashtë për 1-0 pas asistimit të mirë të Manuel Lanzinit.

Pas këtij goli, Chelsea mori kontrollin e lojës duke tentuar disa herë të shënojnë, por pa pasur sukses dhe skuadrat shkuan në pushim me epërsinë minimale të vendasve.

Në pjesën, e dytë, Blutë dominuan duke tentuar me të gjitha forcat të gjejnë golin e barazimit dhe rrezikuan me Alvaro Moratan dhe Eden Hazardin, por në të dy rastet gabuan dhe ndeshja përfundoi me fitoren 1-0 të West Hamit.

Pas kësaj fitore, West Hami renditet në pozitën e 18 me 13 pikë, ndërsa Chelsea në vendin e tretë me 32 pikë.

Në ndeshjen e ardhshme, Çekanët e presin Arsenalin, ndërsa Blutë udhëtojnë te Huddersfieldi. /Telegrafi/  

https://www.youtube.com/watch?v=qWdLyjvGY4Y