Vuçiq: Jam i kënaqur me arritjen e marrëveshjes mes KEDS dhe Elektrosever

KEDS dhe Elektrosever, së fundmi kanë nënshkruar kontratën për normalizimin e shpërndarjes dhe të furnizimit me energji elektrike në pjesën veriore të Kosovës.

E për nënshkrimin e kësaj kontrate ka folur edhe presidenti i Serbisë, Aleksandar Vuçiq.

Vuçiq u shpreh i kënaqur për arritjen e marrëveshjes mes KEDS-it dhe Elektrosever-it.

“Ende jemi duke shikuar detajet, do të vijojë nënshkrimi i kontratës me popullatën, siç e dini rrymën e kanë paguar vetëm 11 për qind e veriut, jam i kënaqur që KEDS dhe Elektrosever kanë arritur marrëveshje dhe kështu shmangim çdo mundësi që njerëzit në veri të Kosovës të mos mbesin pa energji elektrike”, tha Vuçiq, shkruajn mediat serbe.

Lexo po ashtu KEDS e quan moment historik nënshkrimin e kontratës me Elektroseverin

Ndryshe KEDS e ka cilësuar moment historik arritjen e marrëveshjes me Elektrosever për rrymën në veri.

“KEDS njofton se është nënshkruar kontrata me Elektrosever, e cila ka për qëllim normalizimin e shpërndarjes dhe furnizimit me energji elektrike në komunat Zubin Potok, Leposaviq, Zveçan dhe Mitrovicë Veriore.

“Kjo kontratë përkon me ligjin e Kosovës dhe kornizën rregullative, në përputhje me Marrëveshjet në lidhje me Energjinë të datës 8 shtator 2013 (“Marrëveshjet e Energjisë 2013”) dhe Konkluzionet e Lehtësuesit të BE-së për zbatimin e Marrëveshjes së Energjisë të vitit 2013, të datës 25 gusht 2015 (“ Marrëveshjet për Energjinë të vitit 2015”), si dhe Udhërrëfyesin për Zbatimin e Marrëveshjeve Energjetike të 21 qershorit 2022”, thuhej në njoftim. /Telegrafi/