Ura kyçe SHBA-Kanada rihapet pas gati një jave, pasi policia largon protestuesit

Kalimi kufitar më i ngarkuar SHBA-Kanada u rihap të dielën vonë pasi protestat kundër kufizimeve të COVID-19 e mbyllën atë për gati një javë.

Detroit International Bridge Co tha në një deklaratë se “Ura e Ambasadorit tani është plotësisht e hapur duke lejuar edhe një herë fluksin e lirë të tregtisë midis ekonomive të Kanadasë dhe Shteteve të Bashkuara”.

Esther Jentzen, zëdhënësja e kompanisë, tha në një tekst të mëvonshëm për Associated Press se ura u rihap për trafikun në orën 23:00, përcjell Telegrafi.

Kalimi zakonisht mbart 25% të të gjithë tregtisë midis dy vendeve dhe bllokada nga ana kanadeze kishte ndërprerë biznesin në të dy vendet, me prodhuesit e automjeteve të detyruar të mbyllnin disa fabrika montimi.

Policia në Windsor, Ontario, tha më herët gjatë ditës se më shumë se dy duzina njerëz ishin arrestuar, shtatë automjete u tërhoqën ndërsa oficerët larguan demonstruesit e fundit nga afër urës, e cila lidh qytetin – dhe fabrikat e shumta kanadeze të automobilave – me Detroitin.

Ndërkohë, protesta në Otavë ka paralizuar qendrën e qytetit, tërbuar banorët të cilët janë ngopur me mosveprimin e policisë dhe ka rritur presionin ndaj kryeministrit Justin Trudeau, i cili kryesoi një mbledhje të kabinetit të dielën vonë.

Demonstratat kanë bërë jehonë në të gjithë Kanadanë dhe më gjerë, me kolona të ngjashme në Francë, Zelandën e Re dhe Holandë.

Departamenti Amerikan i Sigurisë Kombëtare paralajmëroi se autokolona kamionësh mund të bëhen edhe në Shtetet e Bashkuara. /Telegrafi/