Teuta dështoi në finale të Ligës Ballkanike

Teuta nuk ia ka dalë ta çojë deri në fund mrekullinë në Ligën Ballkanike në basketboll për meshkuj. Skuadra durrsake që ishte në pjesëmarrjen e saj të parë në këtë eveniment arriti të kalojë në finalen, ku u përball me skuadrën e Blokotehnës, ndaj së cilës humbi (82-68).

Në këtë mënyrë, skuadra maqedonase që u shpall kampione e Ballkanit, ndërkohë që skuadra e drejtuar nga Afrim Bilali u kënaq me medaljen e argjendtë

Që në fillim u duk se Teuta do ta kishte mjaft të vështirë për të fituar këtë finale pasi skuadra e Blokoteknës e vuri kontrollin e saj në parket shumë shpejt teksa fitoi çerekun e parë (25:9).

Lexo po ashtu Të gjitha lajmet nga Liga Ballkanike

Teuta pati momente më të mira në dhjetëminutëshin e dytë, të cilin e fitoi (21:17_ duke e reduktuar disi disavantazhin në këtë finale teksa skuadrat shkuan në pushimin e ndeshjes me rezultatin 42-30 për maqedonasit.

Me rikthimin në parket, Blokotehna e thelloi akoma më shumë diferencën në pikë, pasi e mbylli fraksionin e tretë 28:15 duke e çuar rezultatin përpara fillimit të 10 minutëshit të fundit 70-45.

Në çerekun e katërt të ndeshjes, u pa një Teutë shumë më e saktë në lojën e saj e cila arriti të fitojë këtë fraksion të lojës 23:12, por për durrsakët ishte shumë vonë, pasi sfida u mbyll me rezultatin 82-68 në favor të Blokotehnës që u shpall kampione e Ballkanit.

Është kjo një humbje që gjithsesi nuk ia zbeh meritat skuadrës së Teutës për të cilën edhe kjo medalje e argjendtë është një sukses i rëndësishëm pasi tregon formën mjaft të mirë të shfaqur në këtë eveniment.