Sindikata e PTK-së kërkon nga Qeveria të zgjidhë problemin me llogaritë e bllokuara në Telekom

Kryeministri Avdullah Hoti, sot priti drejtuesit e Telekomit dhe të Sindikatës së PTK-së, por nuk u dha asnjë detaj se çfarë është folur apo se si mund të dilet nga kriza.

Pas kësaj, Federata Sindikale e Pavarur e Postës dhe Telekomit ka kërkuar nga Qeveria që si aksionare e kësaj ndërmarrje të marrë edhe përgjegjësinë për gjendjen e krijuar.

Llogaritë e Telekomit janë bllokuar së fundmi pasi ka humbur një rast në Dardafone.net (Z Mobile) në Arbitrazh. Përmbaruesit kanë bllokuar llogaritë, duke kërkuar shlyerjen e borxhit të përmbarimit në vlerë mbi 26 milionë euro.

Lexo po ashtu Hoti takon drejtuesit e Telekomit, s’jep detaje për situatën e krijuar

“Kryetari (i Sindikatës Lamih Balaj v.j.) i shpalosi qëndrimet e Federatës dhe rekomandimet për Qeverinë e Kosovës që sa më shpejt të behet zhbllokimi i llogarive të Telekomit të Kosovës dhe të mos ketë pengesa në operimin e punëve ditore. Gjithashtu kemi kërkuar që aksionari të marrë përgjegjësinë direkte, sepse bordet të cilat i kanë miratuar nënshkrimin e kontratave te dëmshme kanë qenë të emëruara nga Qeveria e Republikës se Kosovës dhe është përgjegjësi e Qeverisë si aksionare 100% ta mbrojë pasurinë shtetërore, ashtu siç e parasheh edhe Kushtetuta e Republikës se Kosovës. FSP-PTK do t’u japë hapësirë negociatave të Qeverisë për gjetjen e një zgjidhje sa më të shpejtë qe të lirohen llogaritë e Telekomit, të bllokuara nga zhvatësi 10-vjeçar Z-Mobile”, thuhet në njoftimin e Sindikatës së PTK-së.