McLaren ka prodhuar vetëm pesë kopje të modelit të fuqishëm F1 LM dhe një prototip, që do të thotë se është një veturë jashtëzakonisht e rrallë dhe e shtrenjtë. Megjithatë, një entuziast nga Afrika e Jugut vendosi të bëjë një kopje për vete.

McLaren F1 LM ishte një seri prej pesë veturash speciale të prodhuara për nder të pesë McLaren F1 GTR që përfunduan garën “24 Ore Le Mans” në vitin 1995. Ajo ka aerodinamikë të ndryshme, pa kondicioner dhe pa izolim të brendshëm të zërit. Vizualisht, ndoshta ndryshimi më i madh midis modelit standard F1 dhe modelit F1 LM është në spoilerin aktiv dhe spoilerin e pasmë dukshëm më të madh se CFRP.

Sigurisht, McLaren nuk i ka bërë kurrë publike planet dhe diagramet e modelit F1 LM, por kjo nuk do të thotë se është e pamundur të bëhet një kopje, siç e ka dëshmuar Danie Brough nga Afrika e Jugut. Ai realizoi ëndrrën e tij në një projekt që nisi 23 vite më parë dhe që më në fund përfundoi.

Është një kopje portokalli Papaja e McLaren F1 LM, e cila është krijuar në bazë të përmasave të marra nga fotot dhe modelet më të vogla.

“Gjithçka që shihni në makinë, e bëra vetë. Përjashtim bën motori V12 me dy turbo të BMW-së i çiftuar me transmisionin manual me 6 shpejtësi të Audi. Projekti kërkoi vite kërkime, shikimin e fotografive dhe përmasat”, tha Brough.

Në ndërtimin e trupit janë përdorur alumini, fibra karboni dhe pleksiglas, ndërsa në ndërtimin e shasisë është përdorur një kombinim i aluminit dhe fibrës së karbonit.

Vetura origjinale peshon 1140 kg dhe kopja 1180 kg. Motori i lartpërmendur BMW me dy turbo V12 zhvillon 650 kuaj/fuqi. /Telegrafi/