Piktori i parë profesionist i filmit shqiptar, Shyqyri Sako, në Qendrën për Hapje dhe Dialog ka hapur ekspozitën “Duke pikturuar filmin”. Teksa artisti rrëfen nëpërmjet pllakateve historinë e kinematografisë shqiptare të para viteve 1990, ndalet edhe tek situata ku gjendet sot filmi shqiptar

“Njësiti Gueril” (1969), “Kapedani” (1972), “Rrugë të bardha” (1974), “Dimri i fundit” (1976), “Tomka dhe shokët e tij” (1977), “Mësonjëtorja” (1979), “Fundi i një gjakmarrjeje” (1983), “Shpella e piratëve” (1990), “Përdhunuesit” (1994) etj., janë disa nga posterat që rrëfejnë punën e palodhur të Sakos. Por sot, sipas tij, jo vetëm piktorë filmi që nuk ka më, por nuk ka as prodhime cilësore kinematografike shqiptare

“E dashuruam kinematografinë, nuk pyetëm sa është rroga apo dieta. E bëmë me shpirt. Ishim atdhetarë, menduam të bëjmë diçka që të mbetet për këtë popull. Pas viteve 1990 nuk ka më filma. Më falni, por filma nuk kam parë. Bëjnë disa filma, por trajtojnë probleme të lehta. Kinematografia jonë ka zbërthyer problemet e këtij populli”, thotë Sako, teksa përfundon. /Shqiptarja/