Shkel rregullat e trafikut, godet çiklistin i cili më pas ndërron jetë – aktakuzë për vozitësin në Gjilan

Prokuroria Themelore në Gjilan ka ngritur aktakuzë kundër të pandehurit Q.E., pasi që i njëjti shkaktoi aksident trafiku, si pasojë e të cilit një person ka humbur jetën.

Sipas aktakuzës, i pandehuri më 30 nëntor 2019 në Gjilan, nga pakujdesia, duke drejtuar automjetin e markës ‘’Ford Connect’’, si pasojë e tejkalimit të pasigurt dhe mos mbajtjes së distancës së mjaftueshme anësore, ka goditur E.H., i cili kishte qenë duke lëvizur me biçikletë, në drejtim të njëjtë me lëvizjen e automjetit.

I njëjti pas goditjes përplaset në rrugë, duke pësuar lëndime të rënda trupore, për të cilat ka kërkuar ndihmë mjekësore fillimisht në Emergjencën e Spitalit Regjional në Gjilan, pastaj në QKUK, në Prishtinë, me ç’rast pas trajtimit mjekësor nga plagët e marra ka ndërruar jetë.

Me këto veprime, i pandehuri ka kryer veprën penale ‘’Rrezikim i trafikut publik’’, nga neni 370 paragrafi 9 lidhur me paragrafin 1 të Kodit Penal të Republikës së Kosovës.

I pandehuri gjendet nën masën e arrestit shtëpiak që nga data 30 nëntor 2019. /Telegrafi/