Sela: Do të isha i interesuar për amnesti nëse do të përfshiheshin edhe rastet “Monstra”, “Alfa”

Kryetari i Aleancës për Shqiptarët, Ziadin Sela sot tha se vazhdon të jetë konsistent në qëndrimet e tija, të cilat i ka shprehur publikisht teksa ka qenë kryeopozitar.

“Do të vazhdoj të jem konsistent në qëndrimet e mija. Do të vazhdoj t’ju qëndroj prapa deklaratave të mija të shprehura si kryeopozitar, sepse i kam thënë pa ndonjë prapavijë, për të nxjerr popullin në dritë, sepse jemi shumë larg dritës”, tha Sela.

Ai tha se nuk kanë komentuar zhvillimet në Bashkimin Demokratik për Integrim pas paraqitjes së “Grupit të zjarrit”, sepse nuk donim të luanim rolin e zëdhënësit. Kështu vlerëson Ziadin Sela nga Aleanca për Shqiptarët në “ClickPlus”.

Sela gjithashtu tha se Izet Mexhiti, tani lideri i partisë Lëvizja Demokratike e kidnapoi deputetin Kastriot Rexhepin pak para votimit të mocionit të Qeverisë, dhe tani e bëri pjesë të partisë së tij.

“E kidnapoi apo e mori në shtëpi deputetin Rexhepi dhe kjo është koha kur duhej të kishte 61 deputetë opozita. Kjo çështje tani nuk më takon mua, pasi është çështje që i takon BDI-së dhe ASh nuk është përzier në këtë çështje sepse është çështje e brendshme partiake”, tha Sela.

Sela shtoi se do të ishin të interesuar, ai personalisht dhe subjekti politik që i takon ai për këto ndryshime, nëse në tryezën e bisedimeve do të vendoseshin edhe lehtësimet e dënimeve për të dënuar të tjerë, siç është rasti “Monstra”, “Lagjja e trimave” dhe “Alfa”.

“Nuk do të ishte mirë për shtetin e së drejtës që të amnistohen vetëm politikanët. Nëse do të hapej kjo, unë do të isha i interesuar për këtë rast nëse në tryezë do të vendosej rasti “Monstra”, “Lagja e trimave” e “Alfa””, tha Sela.