Ministri i Punëve të Brendshme, Xhelal Sveçla, ka përgëzuar Policinë e Kosovës dhe Prokurorinë për realizimin e suksesshëm të aksionit “Brezovica”, me ç’rast janë sekuestruar mbi 50 objekte, që janë ndërtuar në kundërshtim me Ligjin për Parkun Kombëtar “Sharri” si dhe Planin Hapësinor për Pakun Kombëtar “Sharri”.

Reklama

Sveçla, përmes një postimi në Facebook, ka thënë se përgëzon Policinë e Kosovës, Prokurorinë dhe të gjitha institucionet tjera për realizimin e suksesshëm të aksionit të radhës në luftën e pakompromis ndaj krimit, korrupsionit dhe keqpërdorimit të detyrës zyrtare, në aksionin ‘Brezovica’ pas vlerësimit të raporteve nga Drejtoria për Hetimin e Krimeve të Rënda në Prishtinë, Agjencia Kadastrale e Kosovës dhe Agjencia për Mbrojtjen e Mjedisit të Kosovës.

Reklama

“Jemi te vendosur që të zbatojmë maksimalisht ligjin dhe të gjithë shkelësit e keqpërdoruesit të vendosen para drejtësisë dhe organeve kompetente”, ka shkruar Sveçla, transmeton Telegrafi.

Reklama

“Lufta jonë ndaj krimit, korrupsionit dhe zhvatësve të pasurisë publike do të vazhdojë edhe në ditët e ardhshme me të gjitha angazhimet e plota të organizmave tanë institucional në mbrojtjen efektive të së përbashkët”, ka shkruar ministri Sveçla.

Mbi 50 objekte janë sekuestruar përkohësisht të martën në Brezovicë, në mesin e tyre dhe një hotel. Këto objekte janë ndërtuar në kundërshtim me Ligjin për Parkun Kombëtar “Sharri” si dhe Planin Hapësinor për Pakun Kombëtar “Sharri”.

Reklama

Kështu tha në një prononcim për Telegrafin, prokurori i Prokurorisë Themelore në Ferizaj, Rasim Maloku.

Sipas tij, gjatë ditës së sotme pritet të sekuestrohen përkohësisht rreth 70 objekte, mirëpo për shkak të kushteve atmosferike puna do të vazhdojë dhe në ditët e ardhshme. /Telegrafi/