Sejdiu: Themelimi i ndërmarrjes për blerjen e energjisë monstrum ekonomik

Shefi i Grupit Parlamentar të Partisë Social Demokrate Dardan Sejdiu e ka kritikuar ministrin e Zhvillimit Ekonomik, Valdrin Lluka për themelimin e ndërmarrjes së re e cila sipas tij, do të bëjë blerjen e rrymës nga Countur Global.

Sejdiu tha se kjo do të jetë vetëm transfer i parasë së qytetarëve në xhepat e kompanisë që do ta ndërtojë Termocentralin “Kosova e Re”.

“Për ne si PSD janë të rëndësishme dy çështje, interpelanca për ministrin e Zhvillimit ekonomik, Valdrin Lluka për themelimin e ndërmarrjes së re që do të bëjë blerjen e energjisë nga Countur Global që për neve është e dëmshme. Ndërsa ndërmarrja e themeluar është monstrum ekonomik që do të jetë vetëm transfer i parasë së qytetarëve në xhepat e Countur Global”, tha Sejdiu, shkruan Telegrafi.

“Nëse vazhdon kështu do të jetë rëndesë për 20 vjet për sektorin energjetik. Jemi të interesuar që secilin komponentë të kësaj marrëveshje ta shpërfaqim në Kuvend dhe e cili deputet e qytetar ta ketë parasysh llojin e marrëveshjes që po futet kjo qeveri në këtë kohë që kemi nevojë për shtet zhvillimor e jo një shtet që zhvatet nga kompanitë e huaja”, tha shefi i deputetëve të PSD-së në Kuvendin e Kosovës, Dardan Sejdiu. /Telegrafi/