Restoranti i shqiptarit në Kroaci që doli në Netflix, flet pronari Akiku

Emisioni “Somebody Feed Phil” ishte në qendër të vëmëndjes në Kroaci pas shëtitjes së autorit të emisionit për gatim dhe ushqim, Phil Rosenthal i cili viziton vendet e gatimit dhe shitjes së ushqimit në të gjithë botën. Në serinë e emisionit të muajit tetor të dhënë në Netflix, Rosenthal ka qenë edhe në restorantin e shqiptarit nga Maqedonia e Veriut, ST BUREK SPLIT që udhëhiqet nga Adnan Akiki, njofton Telegrafi Maqedoni.

Ne kemi biseduar me Adnanin për veprimtarinë dhe për biznesin me produkte të brumit nga fillimi e deri më tani. Gjithashtu kemi biseduar edhe për të ardhmen dhe mesazhin që ai e ka për të rinjtë.

Në pyetjen e Telegrafit në Maqedoni për arritjet dhe suksesin, Adnani nga Zherovjani i Tetovës ka thënë se suksesi i tyre është arritur me punë dhe lodhje që nga vitin 1958, nga një lokacion tjetër në Skradin të Kroacisë dhe pastaj në Bashka voda nga viti 1967 dhe pastaj me hapjen e biznesit familjar ST Burek në Split nga viti 1983, ku janë edhe sot. Akiku thotë se është një biznes i punuar nga tre breza të familjes. Ai thotë se biznesin e ka trashëguar nga babai dhe tashmë është duke i’a lënë biznesin djalit të tij.

Duke biseduar rreth dokumentarit të Phil Rosenthal me kërkesë të Netflix, Akiku ka thënë se përzgjedhja e restorantit të tij është bërë nga klientët e mahnitur nga produktet e tyre. Në të kaluarën Akiku thotë se kanë pasur klientë të famshëm dhe të njohur nga bota e sportit, kulturës dhe biznesit dhe këtë e kanë arritur duke ofruar kualitet. Sipas Akikut njohja e restorantit familjar është bërë nga turistët që e kanë rekomanduar nëpër rrjete e ndryshme socilae duke thënë “kur të jeni në Split të Kroacisë mos e humbni mundësinë të hani burekun e ‘ST Burek Split’.

Ai thotë se me punë arrihet gjithçka dhe për këtë sugjeron që të rinjtë mos e humbin vullnetin, shpresën dhe duhet të synohet çdo herë suksesi pasi kjo tregon edhe kulturën kombëtare. Akiku thotë se shqiptarët janë ambasadorë të suksesit në Kroaci duke përfaqësuar popullin shqiptar si punëtorë dhe të zellshëm. /Telegrafi/

Pjesë nga dokumentari