Qytetarit nga Shtërpca ia dogjën veturën derisa po mblidhte boronica në Prevallë

Idriz Idrizi nga fshati Brod i komunës së Shtërpcës tash e dy ditë është duke kërkuar nga organet e drejtësisë që sa më shpejtë ta zbardhin rastin e djegies së veturës së tij në malet e Prevallës derisa ishte duke mbledhur boronica.

Idrizi, ka thënë për Telegrafin se vetura i është djegur nga disa persona të dyshuar që e kryenin të njëjtën punë në këto male.

“Kemi qenë në bjeshkën e Prevallës duke mbledhur boronica rreth orës 7:30 të mëngjesit të së mërkurës. Aty në atë vend kemi qenë disa dhjetëra persona apo qytetar me 9 vetura që e bëjnë të njëjtën punë. Kemi filluar me u shpërnda nëpër bjeshkë me mbledh boronica. Grupi i parë prej 10 personave që ka lëvizur diku 20 minuta para neve janë larguar rreth një kilometër nga ne. Kur ne jemi ngjitur bjeshkës përpjetë një person është nda prej tyre dhe ka ardhur bjeshkës te poshtë, mirëpo ka ikur diku rreth 200 deri 500 metra prej neve dhe ka shkuar te vendi ku kanë qenë veturat. Dyshoj se ai ia ka vënë flakën veturës sonë dhe ka ikur në drejtim të Prevallës”, ka thënë Idrizi. Ai ka thënë se organet e drejtësisë e kanë të lehtë ta gjejnë personin i cili kreu këtë vepër penale.

“Ne kemi vrapuar dhe jemi kthyer te vetura me qëllim që personin do ta kapim, por ai ka ikur. Personi ka pasur të veshur rroba me ngjyrë të zezë dhe me një kapel ngjyre të zezë në kokë. Rastin e kemi lajmëruar në stacionin e policisë në rajonin e Prizrenit, prandaj kërkojmë drejtësi dhe zbardhje të rastit sa më shpejtë”, ka kërkuar Idrizi.

Telegrafi, ka kontaktuar me zëdhënësin e Policisë në rajonin e Prizrenit Shaqir Bytyqi, i cili ka thënë se po punohet në këtë drejtim.

“E kemi pranuar ankesën lidhur me këtë rast, pastaj ekipet e policisë kanë dalë në vendin e ngjarjes dhe e kanë parë veturën që është djegur. Ndërkohë jemi duke i vazhduar hetimet lidhur me këtë rast. Por, deri më tash nuk ka të arrestuar”, ka thënë Bytyqi. /Telegrafi/