Qeveria emëron Bordin e Përkohshëm të Telekomit

Qeveria e Kosovës ka emëruar Bordin e përkohshëm të drejtorëve të ndërmarrjes publike Telekomi i Kosovës.

Sipas komunikatës për medie, përbërja e këtij bordi është si vijon: Mehmet Berisha, kryesues, Kushtrim Krasniqi, anëtar, Teki Shala, anëtar, Blerim Shehu, anëtar.

“Me kërkesë të Kryeministrit të Republikës së Kosovës, Avdullah Hoti dhe në pajtim me Rregulloren e Punës së Qeverisë, Qeveria e Republikës së Kosovës ka zhvilluar mbledhjen korresponduese (mbledhje elektronike), të 16-ën me radhë, në të cilën ka shqyrtuar dhe ka miratuar vendimin për emërimin e Bordit të përkohshëm të drejtorëve të Ndërmarrjes Publike “Telekomi i Kosovës Sh. A”, i cili do të përbëhet nga: Mehmet Berisha, kryesues, Kushtrim Krasniqi, anëtar, Teki Shala, anëtar, Blerim Shehu, anëtar”, thuhet në komunikatë.

“Emërimi i këtij bordi është bërë në përputhje me legjislacionin në fuqi për ndërmarrjet publike dhe pas dorëheqjes së Bordit të përkohshëm të kësaj ndërmarrjeje. Ky bord i përkohshëm do të shërbejë në cilësi të Bordit të drejtorëve derisa të zgjedhet Bordi i përhershëm”, thuhet në komunikatë.

Lexo po ashtu Letra e dorëheqjes së bordit të Telekomit të Kosovës (Dokument)

Disa ditë më parë, Bordi i Përkohshëm i Telekomit të Kosovës ka dhënë dorëheqje, pasi përmbaruesi ka tërhequr nga xhirollogaria e kësaj ndërmarrjeje të gjitha mjetet që posedonte.

Bordi dorëheqjen e ka paraqitur përmes një letre dërguar kryeministrit Avdullah Hoti dhe ministrit të Ekonomisë, Blerim Kuçi.

“Na lejoni të ju njoftojmë se ne anëtarët e Bordit të Përkohshëm të Drejtorëve: Genc Rraci, Naim Maloku, Lule Ahmedi dhe Hekuran Nikqi e paraqesim dorëheqjen tonë të parevokueshme”, thuhet në letër, përcjell Telegrafi.

Kujtojmë se në muajin mars, ish-qeveria e udhëhequr nga Albin Kurti kishte emëruar bordin e ri. /Telegrafi/