Punëtorët e Korporatës Energjetike të Kosovës (KEK) kanë protestuar para objektit të Qeverisë së Kosovës për të kundërshtuar përfshirjen e tyre në Ligjin për Pagat.

Në hyrje të protestës, nënkryetari i Sindikatës së Re të Korporatës Energjetike të Kosovës (SR- KEK), Nexhat Llumnica, ka thënë se nëse nuk realizohet kjo kërkesë, atëherë greva do të përshkallëzohet.

“Nga kjo protestë iu bëjmë me dije institucioneve se nuk do të rrimë të qetë, nëse nuk ka realizim të kërkesës ne do ta përshkallëzojmë grevën edhe me protesta. Nëse kjo kërkesë e jona nuk realizohet, atëherë do të marrim veprime konkrete. Kërkojmë që të ketë interpretim të duhur të Ligjit për ndryshe do të jetë edhe më keq. I bëjë thirrje presidentit të vendit që të na ftojë e të diskutojmë pasi që jemi shumë të arsyeshëm”, ka thënë Llumnica.

Llumnica: Nëse ulen pagat e punëtorëve të KEK-ut, do ta ndalim prodhimin e rrymës (Video) Llumnica: Nëse ulen pagat e punëtorëve të KEK-ut, do ta ndalim prodhimin e rrymës (Video)

Ai ka shtuar se punëtorët e KEK-ut nuk kanë nevojë për fjalë boshe.

“Ne nuk kemi nevojë për fjalë, jemi mësuar me fjalë boshe, kemi nevojë që të na kthehet Ligji. Qeveria në vend që të na stimuloj, ajo po na shkel. Në vend që të ketë politika zhvillimore, çdo herë punëtorët po shkelen”, shtoi ai.

Ndërsa, kryetari i BSPK-së, Avni Ajdini, në përkrahje të kësaj proteste ka thënë se këta punëtorë po kërkojnë djersën e tyre.

“Ne nuk po kërkojmë lëmosh, ne po kërkojmë djersën tonë. Ne nuk po ua japim individëve, por do t’ia japim vendit. Punëtorë të nderuar, gjithmonë do të jemi së bashku në realizimin e kërkesave tona”, ka thënë ai.

Pakënaqësi me Ligjin për Paga ka pasur edhe nga shërbyesit civilë, kontrollorët ajror dhe Shërbimi Korrektues i Kosovës. /Telegrafi/