Nënkryetari i Komunës së Skenderajt, Nuredin Lushtaku dhe drejtorët komunal, kanë pritur sot Benito Mares, nga Shtetet e Bashkuara të Amerikës, që është ideatori dhe financuesi kryesor i  projektit për ndërtimin e Kompleksit të Dëshmorëve në Marinë.

Gjatë bashkëbisedimit, nënkryetari Lushtaku e ka falënderuar mikun amerikan për realizimin e këtij projekti, i cili ka mundësuar që të gjithë dëshmorët e Drenicës të prehen të qetë në një vend.

Nënkryetari Lushtaku ka thënë se Komuna e Skenderajt dhe të gjitha familjet e dëshmorëve janë falënderuese dhe të kënaqur me këtë projekt, ku homazhet për familjarët e tyre trima tashmë i bëjnë në Kompleksin e Dëshmorëve, në një hapësirë që po mirëmbahet shumë mirë, ashtu siç edhe e meritojnë heronjtë e Ushtrisë Çlirimtare të Kosovës.

Në shenjë falënderimi për kontributin e dhënë, në emër të kryetarit të Komunës, Bekim Jashari, nënkryetari Lushtaku i ka dhuruar mikut tonë amerikan një dhuratë, ndërkaq në emër të tij personal, i ka dhuruar stemën e UÇK-së me figurat e ndritura të Familjes Jashari: Shaban, Adem e Hamëz Jashari.

Me këtë rast, Mares tha se ndihet i nderuar me pritjen, shoqërimin miqësor dhe dhuratat e pranuara, të cilat, siç shtoi, do t’i vendos me kënaqësi në ambientin e tij shtëpiak.

Ai bëri të ditur gjithashtu edhe një projekt tjetër, i cili pritet që shumë shpejt të fillojë të jetësohet, e që ka të bëjë me dokumentimin e luftës dhe kompleksit të UÇK-së në Marinë.

Ai tha se do t’i mbetet merak që nuk do të mund të marrë pjesë në ceremoninë e shënimit të 20-vjetorit të çlirimit të Skenderajt, por ka uruar të gjithë për këtë përvjetor jubilar.

Gjatë qëndrimit në Skenderaj, Mores ka vizituar edhe Kompleksin e Dëshmorëve në Marinë, dhe ka mbetur i kënaqur me përfundimin e procesit të rivarrosjes së dëshmorëve të Drenicës, si dhe me mirëmbajtjen e hapësirave brenda tij.