Policia tregon si u arrestua Marko Gjuriqi

Policia e Kosovës ka dhënë detaje lidhur me arrestimin e të ashtuquajturit drejtor të Zyrës për Kosovën pranë Qeverisë së Serbisë Marko Gjuriq, duke thënë se gjatë aksionit për arrestimin e tij ka pasur rezistencë nga ana e serbëve, por pavarësisht kësaj policia ka arritur të kryejë detyrat e saja sipas urdhrave të shtetit të Kosovës.

Zëdhënësi i Policisë së Kosovës, Baki Kelani, në një deklaratë për media në orët e mbrëmjes, tha se Gjuriq është dëbuar nga Kosova nën përcjelljen e pjesëtarëve të Policisë së Kosovës, pasi që kishte hyrë pa leje në vendin tonë.

“Policia e Kosovës sot ka marrë veprime në veri të Mitrovicës, bazuar në vendimet e MPB-së, i cili ka bërë refuzimin e hyrjes së disa personaliteteve të Serbisë. Bëhet fjalë për Vulin dhe Gjuriq, dhe Policia e Kosovës arriti të kuptojë se ndodhet në Kosovë, në një lokacion ku do të mbahej një tubim me qytetarët”, tha ai, transmeton KP.

Lexo po ashtu Gjuriq deportohet nga Kosova (Foto/Video)

“Policia e Kosovës ka ndërmarrë veprimet e saja për të zbatuar vendimin e autoriteteve të shtetit të Kosovës dhe gjatë hyrjes në atë lokacion, ka hasur në rezistencë aktive. Mirëpo edhe përkundër kësaj rezistence të madhe, policia ishte e vendosur të realizojë vendimet e shtetit të Kosovës dhe arrestoi Gjuriqin. I njëjti është arrestuar dhe bazuar në refuzimin e hyrjes në Kosovë, i njëjti  është larguar nga territori i Republikës së Kosovës”, ka thënë Kelani./Telegrafi/

Foto: AP