Policia australiane zbulon vetura të vjedhura që kapin vlerën e gjysmë milioni euro

Një burrë është arrestuar dhe një operacion është ndaluar pasi policia e Victorias, Australi, zbuloi më shumë se një duzinë veturash të vjedhura në pronën e tij.

Skuadra e Krimeve të Automjeteve me Njësinë e Ekzaminimit të Automjeteve kanë ekzekutuar një urdhër kontrolli në një pronë në Cranbourne afërsisht 56 kilometra në jug-lindje të Melburnit, pas një hetimi për vjedhjen, “rilindjen” dhe shitjen e automjeteve të vjedhura.

Bëhet e ditur se midis gjetjeve ishin një Toyota LandCruiser, Mazda BT-50 dhe shtatë modele Holden me motor V8, shkruajnë mediat e huaja, përcjell Telegrafi.

“Termi rilindje i mbulon disa skenarë të ndryshëm, por në thelb i referohet modifikimit ose heqjes së informacionit identifikues nga një automjet i vjedhur”, tha Julie Macdonald nga Skuadra e Krimeve të Automjeteve.

Gjithashtu, në pronën e hajdutit janë gjetur edhe tre biçikleta dhe pesë motor veturash.

Në total vlera e mallrave të gjetura besohet të jetë më shumë se gjysmë milioni euro.

Policia menjëherë e ka arrestuar 39 vjeçarin i cili akuzohet për manipulim të mallrave të vjedhura dhe trafik droge.

Ndryshe, arrestimi i fundit vjen disa javë pasi policia e vendit kreu një tjetër operacion të supozuar të vjedhjes së veturave në Dandenong. /Telegrafi/