Platformat e mediave sociale mund të detyrohen të bëjnë më shumë për të trajtuar abuzimin seksual të fëmijëve në internet, sipas planeve të reja të Bashkimit Evropian që pritet të shpallen në muajt e ardhshëm.

Sipas mediave të huaja, përcjell Telegrafi, rregullat do të zëvendësonin legjislacionin aktual të përkohshëm që lejon raportimin vullnetar të materialit të abuzimit seksual të fëmijëve (CSAM) me një detyrim ligjor për ta njohur, raportuar dhe hequr atë.

“Unë do të propozoj legjislacionin në muajt e ardhshëm që do t’u kërkojë kompanive të zbulojnë, raportojnë dhe heqin abuzimin seksual të fëmijëve”, tha komisionerja e çështjeve të brendshme të BE, Ylva Johansson për gazetën gjermane Welt am Sonntag të dielën.

“Një raport vullnetar atëherë nuk do të jetë më i mjaftueshëm”, tha ajo.

Meta, kompania mëmë e Facebook, Instagram dhe WhatsApp, do të ndikohej veçanërisht nga çdo ndryshim në rregullore, tha Johansson për gazetën.

Sipas Euronews, kompania aktualisht përbën rreth 95 për qind të njoftimeve të abuzimit seksual të fëmijëve.

Rregullat aktuale të BE-së për raportimin e CSAM-it ua lënë në dorë platformave të mediave sociale dhe shërbimeve të mesazheve që të vendosin nëse do të ndjekin apo jo raste të dyshuara të përdoruesve që kryejnë shkelje të abuzimit seksual të fëmijëve. /Telegrafi/