Petrovska: Investimet në mbrojtje janë pjesë e planifikimit strategjik afatgjatë

Për momentin nuk ka kërcënim konkret për sulm ndaj vendit tonë, por investimet në mbrojtje janë pjesë e rishikimit strategjik të mbrojtjes dhe pjesë e të gjithë planifikimit afatgjatë, deklaroi ministrja e Mbrojtjes Slavjanka Petrovska, lidhur me paralajmërimin për blerjen e sistemit modern të mbrojtjes ajrore nga Franca.

Petrovska tregoi se ndërrimi i sistemit kundërajror që e kemi është një nga obligimet dhe është një projekt që ka filluar para disa vitesh.

“Bëhet fjalë për finalizimin e kontratës, e cila prej disa vitesh vijon procedurën e negociatave me prodhues të ndryshëm, ekzaminimin e pajisjeve të ofruara nga një ekip ekspertësh nga Ushtria dhe atë që u prezantua të premten para Komisionit Parlamentar për Mbrojtjen dhe Sigurinë, është praktikisht dokumenti përfundimtar, sqaroi Petrovska në një deklaratë për media pas konferencës së sotme në Ministrinë e Mbrojtjes.

Implikimet e përgjithshme financiare të kësaj kontrate janë 66 milionë euro, ndërsa Petrovska sqaroi se pagesa do të bëhet për një periudhë katërvjeçare.

“Investimi në mbrojtje duhet të monitorohet në vazhdimësi, sepse në këtë mënyrë e kryejmë funksionin themelor të Ministrisë dhe Armatës, që është mbrojtja e interesave kombëtare dhe shtetërore, tha Petrovska.

Ministria e Mbrojtjes, të premten para Komisionit Parlamentar për Mbrojtjen dhe Sigurinë, bëri me dije se Ministria e Mbrojtjes po i afrohet prokurimit të një sistemi modern të mbrojtjes kundërajrore, për të cilin do të lidhë marrëveshje me Ministrinë e Mbrojtjes së Republikës së Francës.

Siç bën të ditur Ministria e Mbrojtjes, bëhet fjalë për një prokurim shumëvjeçar të sistemit të mbrojtjes kundërajrore në lartësi të ulët, i cili duhet të përmirësojë gatishmërinë luftarake të Ushtrisë dhe që është paraparë në përputhje me Planin për pajisjen dhe modernizimin e Ushtrisë.

Si anëtare e NATO-s, siguria e qiellit tonë garantohet nga forcat ajrore aleate, dhe blerja e sistemit të mbrojtjes kundërajrore është plotësuese me sistemin e përgjithshëm të mbrojtjes së vendit.

Ministria e Mbrojtjes njoftoi gjithashtu se në dy dekadat e fundit nuk është prokuruar asnjë sistem i mbrojtjes ajrore, i cili është i nevojshëm para së gjithash për të mbështetur dhe mbrojtur pjesëtarët e Ushtrisë, mbrojtjen e institucioneve dhe rritjen e sigurisë së qytetarëve të Republikës së Maqedonisë së Veriut.