Në sallën e koncerteve, në ZagrebArena të Zagrebit janë duke u instaluar shtretërit spitalorë për pacientët që nuk janë në gjendje serioze dhe të cilët po trajtohen në spitalet lokale, dhe transferimi i tyre do të organizohet, sipas nevojës, për t’u çliruar kapacitetet spitalore për pacientët me coronavirus.

Pacientët do të transferohen në Arena nga spitalet për të liruar kapacitetin për pacientët e infektuar me COVID-19, nëse është e nevojshme, tha Autoriteti Kombëtar i Mbrojtjes Civile, transmeton Telegrafi.

Shtretërit janë duke u instaluar nga anëtarët e mbrojtjes civile.

Tetë raste të reja të coronavirusit u konfirmuan në Kroaci, e cila e vendos numrin e përgjithshëm në 113.

“Ne e dimë numrin e të infektuarve, e dimë dinamikën në të cilën po rritet numri i tyre, presim më shumë raste në ditët në vijim, por për momentin ne jemi të kënaqur për dinamikën aktuale dhe do të përpiqemi ta ruajmë atë sa më gjatë që të jetë e mundur”, tha Ministri i Shëndetësisë, Vili Beros.

Personeli i ushtrisë kroate të enjten filloi ngritjen e tendave dhe një kamp përpara Spitalit Klinik Dubrava në Zagreb, me një kapacitet prej 270 shtretërve për pacientët me coronavirus, dhe tendat do të ngrihen deri të shtunën. /Telegrafi/