Pasi pranon pëlqimin për të, Egli deklaron se do të largohet nga Gjesti, për të vazhduar lojën e vetme

Raporti i ngushtë që ishte ndërtuar mes Eglit dhe Gjestit brenda shtëpisë së Big Brother VIP Albania duket se ka kaluar në një fazë të ndërlikuar.

Ditët e fundit, ata kanë përjetuar tensione, debate të forta dhe një distancim të dukshëm, duke mos kaluar më kohë bashkë si më parë.

Diskutimi i tyre në spektaklin e sotëm ofroi një dritare në emocionet dhe sfidat e tyre personale.

Egli, e prekur nga situata, pranoi hapur ndjenjat e saj për Gjestin, duke deklaruar: “Ai është i vetmi në këtë shtëpi që unë e besoj, që nuk ka një qëllim të keq ndaj meje. Thjesht, fakti që ndjenjat e mia bien ndesh me atë që ai ndien më ka krijuar një situatë të vështirë. Ndihem pak në siklet, sepse nuk është e lehtë kur ndjenjat nuk janë të ndërsjella, sidomos kur unë jam në rolin e vajzës që po refuzohet. Nuk është një situatë e bukur, por është reale dhe ndodh edhe jashtë shtëpisë”.

Egli theksoi se, pavarësisht gjithçkaje, ajo e respekton sinqeritetin e Gjestit:”Unë kam parë një shqetësim të vërtetë nga ana e tij për mua, i cili më bëri të besoj se mund të kishte diçka më shumë midis nesh, përtej një miqësie të thjeshtë. Kam ndier një simpati, një tërheqje dhe një dashamirësi për të, por e pranoj që nuk e marr në të njëjtën formë që unë do të dëshiroja. Më duhet kohë për ta përpunuar këtë gjë dhe për ta parë situatën me një sy tjetër”.

Nga ana tjetër, Gjesti u shpreh se distancimi i tij ka ardhur si pasojë e një dëshire për të mos e lënduar Eglin: “Kam ndjerë që Egli po fillon të shfaqë ndjenja për mua, dhe unë nuk dua që ajo të lëndohet. Nuk kam të njëjtat ndjenja për të, dhe nuk dua të krijoj iluzione apo të luaj me emocionet e saj”.

Në një moment të ndjerë, Egli foli për perceptimin e saj të situatës dhe për mënyrën se si ndjenjat e saj kanë dalë jashtë një kornize që ajo kishte vendosur për veten: “Gjithë bisedat dhe kimia që kemi ndarë më shtynë të besoj se mund të kishte diçka më të bukur midis nesh. Por e pranoj që nuk është kështu dhe kjo më vë në një pozitë të vështirë, sepse unë po pranoj hapur diçka që nuk do të marrë të njëjtën përgjigje”.

Ky moment i ndërlikuar ka ngjallur emocione të forta, jo vetëm mes dy protagonistëve, por edhe te publiku që ndjek spektaklin. Situata mes Eglit dhe Gjestit mbetet një nga temat më të diskutuara dhe pritet të ndikojë në dinamikën e lojës në ditët në vijim. /Telegrafi/