Përfundon takimi LDK-VV, nuk deklarohen për media

(E plotësuar) Ka përfunduar takimi i kryetarit të LDK-së, Isa Mustafa, të kandidates për kryeministre nga radhët e kësaj partie Vjosa Osmani dhe kryetarit të LVV-së, Albin Kurti, por pas takimit asnjëri prej tyre nuk janë deklaruar për media.

Takimi ka ndodhur pas mbledhjes së kryesisë së LDK-së, e cila nominoi për kryeministre Vjosa Osmani për zgjedhjet e 6 tetorit.

Në takim morën pjesë edhe Lutfi Haziri nga LDK dhe Besnik Bislimi nga LVV.

——————————————————————————

Pas nominimit të Vjosa Osmanit, takohen LDK dhe VV – bisedojnë për koalicionin e mundshëm

Menjëherë pas nominimit të Vjosa Osmanit për kryeministre të Kosovës, kryetari i LDK-së, Isa Mustafa, është zhvilluar një takim me përfaqësuesit e Vetëvendosjes.

Takimin e ka konfirmuar për Telegrafin, anëtari i kryesisë së LDK-së, Lumir Abixhiku.

“Po është duke u zhvilluar një takim mes Isa Mustafës, Vjosa Osmanit, Lutfi Hazirit me përfaqësuesit e Vetëvendosjes. Takimi është duke u zhvilluar dhe po flitet për një bashkëpunim të mundshëm para ose pas zgjedhor”, tha ai.

Kujtojmë që LDK në mbledhjen e kryesisë të mbajtur sot ka vendosur që Vjosa Osmani të jetë kandidate për kryeministre.

Lexo po ashtu Vjosa Osmani kandidate e LDK-së për kryeministre të Kosovës

Po ashtu vlen të përmendet, se kryetari i LDK-së, Isa Mustafa dhe ai i Vetëvendosjes, Albin Kurti kanë zhvilluar takime edhe më herët, ku kanë shprehur disponimin për të bashkëpunuar.

Ndryshe, presidenti i Republikës sё Kosovës, Hashim Thaçi, ka marrё sot vendim për shpalljen e zgjedhjeve tё parakohshme për Kuvendin e Republikës sё Kosovës dhe ka caktuar ditën e diel, 6 tetor 2019, datë për mbajtjen e zgjedhjeve.

Sipas njoftimit për media në vendimin e nënshkruar thuhet se “duke u bazuar nё pёrgjegjёsitё kushtetuese dhe ligjore, presidenti Thaçi ka marrё vendim që zgjedhjet e parakohshme për Kuvendin e Republikës sё Kosovës tё mbahen mё 06 tetor 2019”. /Telegrafi/