Pamje të shpërthimit të madh që tronditi fabrikën e armëve në Iranin qendror – sulmi thuhet se u bë me “dron-bombë”

Një zjarr i madh ka shpërthyer në një fabrikë të industrisë ushtarake iraniane pas një sulmi të dyshuar me dron – ndërsa misteri rrethon çështjen se kush ishte përgjegjës për sulmin.

Sipas mediave të huaja, përcjell Telegrafi, një shpërthim i fuqishëm goditi fabrikën pranë qytetit qendror të Iranit, Isfahan, gjatë natës, mes tensioneve në rritje globale.

Pamjet afër vendit të ngjarjes tregojnë flakë të mëdha që kanë përfshirë objektin dhe shtëllunga tymi të zi që ngrihen nga zona, ndërsa automjetet e urgjencës dhe kamionët e zjarrfikësve mund të shiheshin jashtë kompleksit.

Shkalla e dëmit nuk mund të konfirmohej në mënyrë të pavarur, por zyrtarët në Ministrinë e Mbrojtjes të Teheranit kanë thënë se shpërthimi shkaktoi vetëm dëme të vogla në çatinë e një ndërtese punëtorie dhe nuk pati viktima.

Një deklaratë për televizionin shtetëror tha: “Rreth orës 23:30 të shtunën mbrëma, një sulm i pasuksesshëm u krye duke përdorur mjete ajrore mikro (MAV) në një nga vendet e punëtorisë së ministrisë”.

Zyrtarët thanë se një dron u rrëzua, ndërsa dy të tjerë “u kapën në kurthe mbrojtëse dhe u hodhën në erë”.

Sulmi me dron vjen në mes të tensioneve me Perëndimin lidhur me aktivitetin bërthamor të Teheranit dhe furnizimin me armë për Rusinë, si dhe disa muaj demonstratash antiqeveritare. /Telegrafi/