Një bazë ajrore ruse ku po përgatitej një sulm i madh kundër Ukrainës është goditur nga një sulm i dyshuar me dron që dëmtoi dy bombardues me rreze të gjatë.

Reklama

Sipas mediave të huaja, përcjell Telegrafi, baza ajrore Engels-2, pranë qytetit të Saratovit, u godit nga një shpërthim në orët e para të së hënës, që la të dëmtuar dy aeroplanë bombardues Tu-95, të cilët janë përdorur për të kryer sulme ajrore në infrastrukturën e Ukrainës.

Një tjetër shpërthim goditi gjithashtu bazën ushtarake ruse pranë qytetit Ryazan, duke vrarë tre persona dhe plagosur pesë pas shpërthimit të një kamioni me karburant.

Reklama

Kievi nuk ka marrë përgjegjësinë për shpërthimet.

Engels-2 dhe Ryazan ndodhen midis 500 dhe 700 kilometra nga kufiri me Ukrainën, që është përtej rrezes së raketave të Kievit, që do të thotë se sulmi ka të ngjarë të jetë kryer nga një dron.

Reklama

Disa orë para shpërthimeve, firma ukrainase e armëve Ukrobonoprom pretendoi se kishte testuar me sukses një dron vetëvrasës, shkruan Daily Mail.

Shpërthimi vjen gjithashtu pasi imazhet satelitore u publikuan javën e kaluar që tregonin bombarduesit në bazën ajrore Engels duke u përgatitur për një sulm në Ukrainë.

Një banor në Ryazan ka thënë: “Gjithçka në shtëpinë time ra nga raftet. Mendova se dritaret do të fluturonin jashtë, tmerr. Ne jetojmë jo shumë larg zonës”.

Reklama

Mediumi rus MK tha se shpërthimi i rezervuarit të karburantit Ryazan çoi gjithashtu në dëmtimin e një aeroplani, shkruan më tej Daily Mail.

Rreth një lajmi të tillë kanë raportuar edhe media të tjera si ai britanik “The Sun” dhe mediumi ukrainas “Ukrinform” – dhe jo vetëm. /Telegrafi/

Reklama