OPEC ulë prodhimin e naftës, reagon ashpër Joe Biden

OPEC+ ra dakord për shkurtime të mëdha të prodhimit të naftës të mërkurën, duke frenuar ofertën në një treg tashmë të ngushtë, duke shkaktuar një nga përplasjet e tij më të mëdha me Perëndimin, pasi administrata e SHBA-së e quajti vendimin e papritur si dritëshkurtër.

Udhëheqësi de-fakto i OPEC-ut, Arabia Saudite tha se ulja prej 2 milionë fuçi në ditë (bpd) e prodhimit – e barabartë me 2 për qind të ofertës globale – ishte e nevojshme për t’iu përgjigjur rritjes së normave të interesit në Perëndim dhe një ekonomie më të dobët globale.

Mbretëria hodhi poshtë kritikat se po bashkëpunonte me Rusinë, e cila përfshihet në grupin OPEC+, për të rritur çmimet dhe tha se Perëndimi shpesh drejtohej nga “arroganca e pasurisë” kur kritikonte grupin.

Shtëpia e Bardhë tha se presidenti amerikan, Joe Biden do të vazhdojë të vlerësojë nëse do të lirojë rezervat e mëtejshme strategjike të naftës për të ulur çmimet, raporton reuters.

“Presidenti është i zhgënjyer nga vendimi dritëshkurtër i OPEC+ për të ulur kuotat e prodhimit, ndërkohë që ekonomia globale po përballet me ndikimin e vazhdueshëm negativ të pushtimit të Ukrainës nga (presidenti rus Vladimir) Putin”, njoftoi Shtëpia e Bardhë.

Biden përballet me vlerësime të ulëta përpara zgjedhjeve afatmesme për shkak të inflacionit në rritje dhe i ka bërë thirrje Arabisë Saudite, një aleate afatgjatë e SHBA-së, të ndihmojë në uljen e çmimeve.

Zyrtarët amerikanë kanë thënë se një pjesë e arsyes se pse Uashingtoni dëshiron çmime më të ulëta të naftës është privimi i Moskës nga të ardhurat nga nafta. /Telegrafi/