O’Connell: Nëse keni dëshmi për korrupsion të zyrtarëve, raportoni menjëherë

Ambasadori britanik në Kosovë, Ruairi O’Connell, thotë se votuesit janë ata që mund të sjellin në pushtet dikë por edhe ta largojnë nga aty.

Ai thotë se për krejt ata që ka dëshmi se janë korruptuar apo kanë keqpërdorur detyrën, duhet të lajmërohen dhe dënohen.

“Keni vlera dhe keni treguar trimëri në luftë, keni treguar gatishmëri të përkrahni popullin gjatë luftës. Nuk është puna e vlerës vetëm kaq, duhet mençuri, duhet me kërku llogari, jo me thanë: po ata janë të këqij por duhet me vazhdu me ta sepse qika e dajës ka një vend pune diku në një komunë, po kjo më duket, jo vetëm mua më duket idiotike, por edhe juve, janë arsyetime idiotike. Por, nuk është edhe të kuptohet. Është keqkuptim, që kur je me një parti je kundër Qeverisë, kjo është idiotike. Kjo është kritikë për çdo parti, edhe çdo votues”.

“Kur votuesit, i kam dëgjuar shokët e ngushtë, ishim duke folur për një aferë korruptive, që lidhej me partinë që ai e përkrahë, dhe unë i thash: pse nuk duhet të gjykohet nëse ka dëshmi? Ai tha: sepse ai i partisë tjetër është më i zi”.

“Edhe çka ka lidhje? A paguhesh prej kësaj partie me qenë zëdhënës i tyre? A je pjesë e rrjetit të tyre? Po pse me mbrojt dikë që e shkel ligjin vetëm sepse edhe dikush tjetër e shkel?”, ka thënë ai në Klan Kosova.