Një zakon i padëmshëm mund të ndikojë në shfaqjen e diabetit gestacional

Ekspertët paralajmërojnë gratë shtatzëna se çfarë duhet të mos bëjnë

Hulumtimet e reja kanë treguar se ndërlikimi më i zakonshëm në shtatzëni mund të jetë rezultat i shprehive për të cilat nuk jemi të vetëdijshëm.

Studiuesit amerikanë kanë zbuluar se gratë shtatzëna që janë më të ekspozuara ndaj ekraneve para gjumit kanë më shumë gjasa të zhvillojnë diabetin gestacional, transmeton Telegrafi.

Autorja kryesore e studimit, dr. Minjee Kim, shpjegoi se ekspozimi ndaj dritës gjatë natës ul: nivelin e hormonit melatoninë, prish orën e brendshme të organizmit dhe ndikon në rregullimin e nivelit të sheqerit në gjak.

Diabeti gestacional (diabeti i shtatzënisë) manifestohet si tolerancë e reduktuar ndaj glukozës, më së shpeshti që shfaqet midis javëve 24-28 të shtatzënisë. Zhduket pas lindjes, kur hormonet kthehen në nivel normal (zakonisht 6 javë pas lindjes). Kjo gjendje prek të paktën katër deri në pesë nga 100 gra gjatë shtatzënisë dhe nëse nuk trajtohet, mund të shkaktojë pasoja të padëshiruara si për fëmijën ashtu edhe për nënën.

Domethënë, nëse diabeti gestacional nuk kontrollohet mjaftueshëm, mund të çojë në probleme serioze shëndetësore për foshnjën.

Autorët e studimit të përmendur ndoqën të dhënat e më shumë se 700 grave shtatzëna për të parë sesi ekspozimi ndaj dritës para gjumit ndikon në shëndetin e tyre. Edhe pse vetëm një numër i vogël i grave shtatzëna që morën pjesë zhvilluan diabetin gestacional, rezultatet zbuluan se lidhja ekzistonte.

Siç shpjeguan në raportin e publikuar, gratë shtatzëna që ekspozoheshin ndaj dritës së fortë në shtëpinë e tyre, pavarësisht nëse ishte televizor, kompjuter apo smartphone, kishin më shumë gjasa të zhvillonin këtë ndërlikim të zakonshëm. /Telegrafi/