Një veturë Aston Martin nga filmi i James Bond “Goldfinger” supozohet të jetë gjetur, 24 vjet pasi ishte zhdukur

Një Aston Martin që drejtohej nga Sean Connery në Goldfinger është parë në Lindjen e Mesme 24 vjet pasi ishte vjedhur.

Sipas mediave të huaja, përcjell Telegrafi, makina, e cila i përkiste zhvilluesit të pronës Anthony Pugliese III, u zhduk nga një hangar privat në aeroportin Boca Raton në Florida në vitin 1997 në një grabitje që mbetet e pazgjidhur.

Por mund të ketë shpresë për hetimin pasi një dëshmitar vuri re një makinë me një numër serial që përputhej me Aston Martinin e humbur në një shtëpi private në një vend të Lindjes së Mesme.

Pugliese thuhet se kishte blerë makinën për 275,000 dollarë në një ankand të Sotheby’s në Nju Jork në vitin 1986.

Kompania e tij e sigurimeve i pagoi atij 4.2 milionë dollarë pasi ajo ishte vjedhur dhe siguruesit po ofrojnë një shpërblim prej 100,000 dollarë për këdo që jep informacion që çon në kthimin e sigurt të makinës, e cila tani mund të jetë me vlerë deri në 15 milionë dollarë.

Mendohet se hajdutët e kanë tërhequr automjetin nga hangari para se ta ngarkonin në një aeroplan ngarkesash në pritje dhe ta dërgonin diku larg. /Telegrafi/