Një grua gjendet në një ishull kroat – misteri është se “flet një anglisht të përsosur”, por nuk e mban mend emrin e saj

Policia ka mbetur e befasuar pasi një grua e gjakosur dhe e mavijosur që flet ‘një anglisht të përsosur’ u gjet në një shkëmb në det në një ishull kroat.

Sipas mediave të huaja, përcjell Telegrafi, gruaja, që mendohet të jetë në të 60-at, u vu re nga një peshkatar ndërsa ishte në shkëmbinj në ishullin Krk, Kroaci.

Ajo kishte pësuar prerje në fytyrë dhe u tha autoriteteve se nuk e kishte idenë se si kishte arritur atje, madje duke mos ditur të tregonte as emrin e saj, raporton The Sun.

Thuhet se ajo fliste një anglisht të përsosur, por autoritetet ende nuk kanë qenë në gjendje të konfirmojnë kombësinë e saj.

Gruaja u shpëtua përfundimisht nga një ekip prej 14 personash të cilët duhej të përdornin 4×4 dhe të ecnin dy kilometra mbi shkëmbinj për të arritur tek ajo.

Zyrtarët thanë se ajo nuk kishte pasaportë, letra ose telefon dhe mezi mund të pinte ujë pasi ishte aq e dobët.

Mësohet se ajo ndodhet në spital për të marrë tretman mjekësor.

Një banore që jeton pranë tha për faqen e lajmeve 24Sata: “Është e çuditshme se si arriti në atë zonë. Është një pjesë jashtëzakonisht e paarritshme e gjirit me gurë tmerrësisht të mprehtë”.

“Nuk ka jetë apo kafshë përveç derrave të egër ose arinjve të cilët dinë të vijnë këtu në kërkim të ushqimit, por kjo është një gjë e rrallë sepse nuk ka ushqim, asgjë”.

Ishulli Krk mbulon 157 kilometra katrorë dhe është ishulli më i madh në detin Adriatik. Ai ndodhet rreth 30 km larg qytetit të Rijekës, dhe është gjithashtu i popullarizuar me turistët. /Telegrafi/