Nigeri ndërpret “me efekt të menjëhershëm” bashkëpunimin ushtarak me SHBA-në

Qeveria e Nigerit njoftoi se po prishte “me efekt të menjëhershëm” marrëveshjen e saj të bashkëpunimit ushtarak me Shtetet e Bashkuara.

Në deklaratë thuhej se qeveria kishte vendosur të “denonconte me efekt të menjëhershëm” marrëveshjen në lidhje me punonjësit ushtarakë dhe civilë amerikanë të Departamentit të Mbrojtjes të SHBA brenda Nigerit, shkruajnë mediat e huaja, përcjell Telegrafi.

Ajo u lexua të shtunën në mbrëmje në televizionin kombëtar.

Shtetet e Bashkuara ende stacionojnë rreth 1000 trupa në Niger në një bazë dronësh në shkretëtirë të ndërtuar me një kosto prej 100 milionë dollarësh.

Lëvizjet atje kanë qenë të kufizuara që nga grushti i shtetit të korrikut 2023 dhe Uashingtoni ka frenuar ndihmën për qeverinë.

Ndryshe, Sekretari amerikan i Shtetit, Antony Blinken bëri një vizitë të rrallë në Niger një vit më parë me shpresën për të mbështetur presidentin Mohamed Bazoum, një aleat i patundur në përpjekjet perëndimore të sigurisë kundër ekstremistëve.

Dhe vetëm katër muaj më vonë, ushtria rrëzoi Bazoumin dhe e vendosi në arrest shtëpie.

Junta mori një linjë të ashpër kundër ish-fuqisë koloniale Francës, duke detyruar tërheqjen e trupave franceze në vend për gati një dekadë.

Ushtria e Nigerit në të kaluarën kishte bashkëpunuar ngushtë me Shtetet e Bashkuara.

Por junta ka kërkuar bashkëpunim me Rusinë. /Telegrafi/