Nëna 76 vjeçare e Elon Musk në pasarelat e modës, merr vëmendjen në sfilatën e “Juzui” gjatë Javës së Modës në New York

Java e Modës në New York ka filluar me shpejtësi, duke ofruar shfaqje të pasarelave për të treguar trendet që mund të dominonjnë në vjeshtë dhe dimër.

Të martën, në Glasshouse, një ndërtesë madhështore buzë lumit, shtëpia e dizajnit “Juzui” pati një arritje të rrallë: e bëri Elon Musk-un të dukej më pak i famshëm.

Pasi në pasarelë modelet defiluan me veshjet e tyre, në fund të shfaqjes doli në pasarelë nëna e miliarderit Musk, Maye.

Flokët e saj të shkurtra ishin të kombinuara me një fustan të gjatë ngjyrë grafiti dhe një xhaketë të bardhë me pupla.

Modelet e tjera kishin silueta të ngjashme, ndërsa motivi kryesor i pasarelës ishte një lule me shumë ngjyra e frymëzuar nga kopshtet e dimrit. Pjesëmarrja e Maye Musk shënon një lidhje të gjatë me shtëpinë e modës.

“Maye si person, si grua, unë e adhuroj dhe e respektoj atë”, tha dizajnerja kryesore Taoray Wang pas shfaqjes për USA TODAY.

“Ajo më frymëzoi”, tha Wang. “Dhe besoj se ajo nuk ka frymëzuar vetëm mua, por ka frymëzuar shumë nga klientët e mi në Kinë”.

Maye, 76 vjeç, është një modele dhe autore me pesë dekada përvojë në modë. Ajo ka qenë edhe më parë në pasarelën e “Juzui” dhe shkëmbeu një përqafim me Wang pas përfundimit të shfaqjes.

Momenti i Maye Musk në pasarelë vjen ndërkohë që djali i saj ka ngritur pozitat e tij në qeveri gjatë administratës së re.

Pas bashkimit me Presidentin Donald Trump në muajt e fundit të fushatës, Musk është bërë një nga ndihmësit më të ngushtë të presidentit, duke ndihmuar në përzgjedhjen e anëtarëve të kabinetit dhe udhëhequr përpjekjet për të zvogëluar numrin e punonjësve të qeverisë.

Disa në Kongres kanë filluar të shprehin shqetësim për mundësinë që Musk ka për të pasur qasje të pakufizuar në strukturat e brendshme të qeverisë.

“Grupi i Musk-ut ka infiltruar një minierë të artë të të dhënave që çdo spiun të huaj dhe aktor i korruptuar do të dëshironte t’i shihte”, tha Senatori Ron Wyden, D-Ore. “Është një recetë për makthe”.

Maye Musk ka qëndruar relativisht e heshtur në lidhje me politikën, megjithatë ajo ka pasur deklarata të ngjashme me ndjenjat kundër emigracionit të Trump dhe Musk në X tetorin e kaluar (ajo është lindur në Kanada dhe u rrit në Afrikën e Jugut). /Telegrafi/