Mund të kolapsojë sistemi kyç i oqeanit që ruan ekuilibrin e temperaturave

Shkencëtarët botërorë paralajmërojnë se përbërja jetike e rrymave oqeanike mund të shembet në vitet e ardhshme, nëse bota vazhdon me ndotjen që ngroh planetin. Sipas parashikimeve të tyre, kjo do të sillte pasoja katastrofike dhe do të prekte çdo person në planet.

Studimi i fundit i botuar në revistën Nature zbuloi se Rryma Meridionale e Atlantikut – pjesë e së cilës është Rryma e Gjirit – mund të shembet nga mesi i shekullit, madje edhe në vitin 2025.

Ndryshimi i Rrymës Meridionale të Atlantikut (AMOC) është një lëmsh kompleks rrymash që funksionon si një rrip transportues gjigant global. Ai transporton ujë të ngrohtë nga tropikët drejt Atlantikut të Veriut, ku uji ftohet, bëhet më i kripur dhe zhytet thellë në oqean, përpara se të përhapet në jug.

Shkencëtarët që nuk ishin të përfshirë në studim i thanë CNN se pika e saktë e kthesës për sistemin kritik është e pasigurt dhe se matjet aktuale deri më tani kanë treguar pak prirje apo ndryshim. Megjithatë, ata ranë dakord se këto rezultate janë alarmante dhe ofrojnë prova të reja se pika kthese mund të vijë më shpejt se sa mendohej.

Ky lëmsh rrymash në ndryshim luan një rol kyç në sistemin klimatik, duke ndihmuar në rregullimin e modeleve globale të motit. Shembja e tij do të kishte implikime të mëdha, duke përfshirë dimra shumë më ekstremë dhe rritjen e nivelit të detit që prek pjesë të Evropës dhe SHBA-së, dhe zhvendosjen e musoneve në tropikët.

Shkencëtarët kanë paralajmëruar për vite të tëra për paqëndrueshmërinë e tij ndërsa kriza klimatike përshpejtohet, duke kërcënuar të prishë ekuilibrin e temperaturës dhe kripësisë nga i cili varet forca e këtyre rrymave. /Telegrafi/