MPJ Maqedoni: Puna e Komisionit për histori është plotësisht autonome dhe profesionale, e mbrojtur nga çdo ndikim politik

Ministria e Punëve të Jashtme plotësisht e mbështet punën e Komisionit për Çështje Historike dhe Arsimore me Republikën e Bullgarisë dhe e përshëndet publikimin e djeshëm të rekomandimeve, të cilat janë pjesë e Protokollit të nënshkruar midis dy vendeve në vitin 2019, njoftojnë nga MPJ.

“Duke i prezantuar rezultatet e punës së tyre, nga ana e vetë anëtarëve të Komisionit dhe Kryetarit të tij u konstatuan disa parime të cilat janë të rëndësishme edhe nga aspekti politik.

Së pari, se puna e Komisionit, përmbajtja në të cilën ajo punon, është plotësisht autonome, në thelb eksperte dhe profesionale, e mbrojtur nga çdolloj ndikimi politik. Ky parakusht qëndron edhe në parimet e Protokollit të nënshkruar ndërmjet dy Ministrive të Punëve të Jashtme dhe paraqet një nga parimet kyçe që siguron profesionalizëm dhe ekspertizë autentike në punën e Komisionit.

Së dyti, rezultatet e paraqitura të punës së Komisionit e ruajnë parimin e reciprocitetit për të dy vendet, që paraqet një nga elementet thelbësore për ndërtimin e besimit dhe respektit të ndërsjellë, parim ky që gjithashtu vihet re edhe në përmbajtjen e Protokollit të nënshkruar mes dy vendeve.

Së treti, me rezultatet e publikuara, Komisioni tregoi se me një qasje të guximshme, por profesionale dhe të ndershme, historianët mund të gjejnë zgjidhje të denja dhe autentike, të bazuara në të vërtetat historike që mbështeten në fakte dhe që ofrojnë mundësi për shënimin e përbashkët të ngjarjeve të caktuara historike, tejkalimin e dallimeve dhe krijimin e një baze për ndërtimin e një të ardhmeje të përbashkët të qëndrueshme mes dy vendeve”, thonë nga MPJ.

Komisioni për Çështje Historike dhe Arsimore me Bullgarinë, shtojnë nga MPJ, edhe më tej do ta ketë mbështetjen e plotë të Ministrisë së Punëve të Jashtme, veçanërisht në drejtim të mbështetjes për autonominë në punën e tij.

Nga MPJ inkurajojnë Komisionin që edhe më tej të vazhdojë punën e tij, i liruar nga presionet politike që krijohen në opinion, duke u mbështetur në profesionalizmin, vetëdijen dhe ekspertizën e tij./Telegrafi/