Edhe pse aventura e Norvegjisë në Kupën e Botës 2026 përfundoi në çerekfinale, futbollistët u pritën si heronj në kthimin e tyre në Oslo.
Dhjetëra mijëra tifozë u mblodhën në sheshin përpara Pallatit Mbretëror për t'i uruar mirëseardhjen kombëtares, e cila realizoi një nga sukseset më të mëdha në historinë e futbollit norvegjez.
Lojtarët dolën në shkallët e Pallatit Mbretëror dhe së bashku me tifozët interpretuan festimin tradicional "Viking Row", ndërsa atmosfera u shndërrua në një festë të madhe ku dominonte ngjyra e kuqe e fanellave norvegjeze.
Pamjet ajrore treguan një det mbështetësish që kishin mbushur sheshin, duke krijuar një atmosferë mbresëlënëse dhe duke shprehur krenarinë për paraqitjen e kombëtares në Botëror.
Para festimit me tifozët, ekipi u prit edhe nga familja mbretërore. Futbollistët u mirëpritën në Pallatin Mbretëror nga Mbreti Harald V, Princi i Kurorës Haakon, Princesha Ingrid Alexandra dhe Princi Sverre Magnus.
Takimi u zhvillua në një atmosferë të ngrohtë dhe miqësore, ku lojtarët patën mundësi të bisedonin me anëtarët e familjes mbretërore, të shkëmbenin përshëndetje dhe përqafime.
Pavarësisht eliminimit në çerekfinale, rrugëtimi i Norvegjisë në Kupën e Botës 2026 konsiderohet historik, ndërsa pritja madhështore në Oslo tregoi se kombëtarja fitoi zemrat e tifozëve me paraqitjet e saj gjatë turneut. /Telegrafi/
