Kryeministri i vendit, Albin Kurti e ka quajtur moment historik takimin e sotëm të Qeverisë së Kosovës dhe Maqedonisë së Veriut në bashkëpunimin ndërmjet dy shteteve.

Kurti theksoi se takimi u mbajt me qëllim të zgjerimit të bashkëpunimit ndërmjet dy vendeve.

“Maqedonia e Veriut sivjet ka kremtuar 30 vjet të pavarësisë e Kosova 13 vjet të pavarësisë dhe kjo ishte mbledhja e parë ndërmjet dy qeverive tona për të intensifikuar dhe zgjeruar bashkëpunimin në shumë fusha”, tha ai, teksa shprehu edhe ngushëllime për vdekjen e 14 personave në spitalin e Tetovës.

Ai tha se takimi i sodit është shprehje e vullnetit për një etapë të re të bashkëpunimit të ndërsjellë.

Kryeministri i vendit bëri të ditur se sot janë nënshkruar 11 marrëveshje në fusha të ndryshme, si në ekonomi, bujqësi, diasporë, turizëm, siguri, energji, kontroll i transportit hekurudhor, lidhja e Brezovicës me Kodrën e Diellit në Shkup, etj.

Ai tha se kanë nënshkruar edhe Memorandum bashkëpunimi për krijimin e një Komisioni përbashkët për  rrugën Prizren-Tetovë.

Kurti tha se kanë folur edhe për situatën me pandeminë dhe respektimin e të drejtave të qytetarëve pa dallim, si vlerë e shteteve tona.

“Si vende me synime të përbashkëta për integrim evropian e kuptojmë se luftimi i krimit dhe korrupsionit është parakusht i rëndësishëm andaj edhe biseduam për rëndësinë e bashkëpunimit në këtë drejtim”, tha ai.

Kreu i ekzekutivit të Kosovës tha po ashtu se Qeveria që ai udhëheq është ngritur dhe qëndron e fortë në zotimin për drejtësi dhe punësim dhe çdo vendim dhe veprim i tyre ka qëllim përfundimtar këto dyja. /Telegrafi/