Man Utd dhe Arsenal kërkojnë Abrahamin, por Mourinho bllokon largimin e tij nga Roma

Tammy Abraham ka pasur sezonin e tij më të mirë në karrierë me fanellën e Romës.

Sulmuesi anglez iu bashkua skuadrës italiane verën e kaluar nga Chelsea për 40 milionë euro dhe shkëlqeu me gola e asistime.

Abraham në 52 ndeshje zyrtare shënoi 26 gola dhe dhuroi pesë asistime të tjera duke ndihmuar Romën ta fitoj edhe Ligën e Konferencës.

Roma tani ndodhet në presion nga dy skuadrat e mëdha angleze Manchester United dhe Arsenal që po e kërkojnë me ngulm rikthimin e anglezit në Ligën Premier.

Megjithatë përgjigja e trajnerit të Romës, Jose Mourinho ka qenë e prerë duke i thënë klubit se nuk dëshiron ta largojë Abrahamin gjatë kësaj vere.

Pas shkëlqimit me fanellën e Romës vlera e Abraham është ngritur ndjeshëm dhe sulmuesi anglez tani vlerësohet rreth 80 milionë euro.

Megjithatë klubi nga kryeqyteti italian nuk e ka ndërmend ta largojë yllin e skuadrës për asnjë çmim së paku këtë verë.

Kujtojmë që Chelsea ka një klauzolë për riblerjen e Abraham, klauzolë e cila aktivizohet në verën e vitit të ardhshëm dhe e cila vlen 80 milionë euro. /Telegrafi/