Legjenda britanike e boksit, Lennox Lewis, ka ndjekur shembullin e Mike Tysonit duke investuar në një fermë legale të kanabisit për përdorim mjekësor.

54-vjeçari ka investuar një shumë të madhe parash në një kompani kanadeze që prodhon kanabis për nevoja mjekësore.

‘Iron Mike’ e ka nisur biznesin e marihuanës në rançin e tij në Kaliforni duke kursyer kështu edhe dhjetëra mijëra dollarë që i shpenzonte për të tymosur vet marihuanë.

Ish-kampionët e botës në kategorinë e peshave të rënda, Mike Tyson, Lennox Lewis dhe Evander Holyfield (Foto: Al Bello/Getty Images/Guliver)

Ndërsa, Lewis ka vendosur që biznesin e tij ta përqendrojë te kompania kanadeze, New Maple Holdings Ltd, e cila është e përfshirë në tregun global për kanabisin medicinal.

“Është gjë ë bukur të jesh pjesë e një ekipi që do të sjellë një rang produktesh të kanabisit medicinal për shumë njerëzit anembanë botës që vuajnë nga sëmundje të tilla, si tronditjet, pagjumësia dhe lëndimet e vjetra sportive e deri te kanceri”, ka thënë Lewis.

Para se të pensionoheshin nga boksi, Tyson dhe Lewis kanë qenë kampionë të padiskutueshëm të botës në kategorinë e peshave të rënda.

Ata u ndeshën me njëri-tjetrin në qershor të vitit 2002, kur Lennox e mposhti me nokaut boksierin që njihej si ‘Njeriu më i keq në planet’ (‘Baddest Man on the Planet’). /Telegrafi/