Ish futbollisti braziliani i Barcelonës, Edmilson, po qëndron në Kosovë ku do ta hap një kamp për futbollistët e rinj.

Ai është takuar me presidentin e FFK-së, Agim Ademi, sot në zyrën e tij, ku Edmilson ishte bashkë me bashkëpunëtorët e tij.

Gjatë këtij takimi ish-futbollisti i njohur, i cili u shpall kampion bote me Brazilin dhe fitoi shumë trofe me Barcelonën, ka shprehur interesim për bashkëpunim me FFK-në.

E gjithë kjo për organizimin e kampeve për futbollistët e rinj, duke pasur parasysh numrin e madh të talenteve që po dalin nga futbolli i Kosovës.

“Me këtë rast, presidenti Ademi i ofroi përkrahje legjendës braziliane dhe vuri në pah se FFK-ja nuk do të bëjë pengesa në mbajtjen e kampeve të tilla në Kosovë nga njerëz të tillë profesionistë dhe që për qëllim kanë zbulimin e talenteve, që në të ardhmen do të mund të luajnë në klube të njohura evropiane dhe në Kombëtaren e Kosovës”.

“Presidenti Ademi në fund të takimit ia ka dhuruar Edmilsonit një fanellë të Kombëtares së Kosovës si dhe një plaketë me stadiumin “Fadil Vokrri””, thuhet në njoftimin e FFK-së./Telegrafi/