Kryeministri i Ukrainës: Mariupoli është “katastrofa më e madhe humanitare” e shekullit

Kryeministri i Ukrainës, Denys Shmyhal e quajti situatën në Mariupol “katastrofën më të madhe humanitare” që nga fillimi i agresionit të Rusisë – dhe ndoshta katastrofa më e keqe e shekullit, pasi qyteti port juglindor përballet me bombardime të vazhdueshme nga forcat ruse.

Duke folur në një konferencë shtypi në Uashington të premten, Shmyhal tha se mijëra njerëz kishin vdekur në Mariupol, duke shtuar: “Ne do të shohim mizoritë e tmerrshme kur do të çlirohet nga rusët”.

Ai tha se trupat ruse po “shkatërrojnë absolutisht gjithçka”, duke përfshirë strehimoret ku po qëndrojnë civilët, përcjell Telegrafi.

Lexo po ashtu Njëzet nga fotografitë më të fuqishme të realizuara në javët e para të agresionit rus në Ukrainë

Rreth 100,000 njerëz mbeten të bllokuar në Mariupol që kur u rrethua nga forcat ruse më 1 mars, sipas zyrtarëve ukrainas.

Zyrtarët ukrainas pretendojnë gjithashtu se më shumë se 20,000 njerëz në qytet kanë vdekur gjatë sulmeve.

CNN shkruan se nuk mund t’i identifikojë në mënyrë të pavarur këto shifra, pasi një numër i saktë i vdekjeve pas javëve të bombardimeve të rënda nuk është i disponueshëm.

Lexo po ashtu Zelensky: Ukraina ishte vetëm fillimi, Rusia ka plane për të pushtuar vende të tjera

Të premten, Shmyhal tha se civilët duke përfshirë gra dhe fëmijë fshihen në fabrikën e çelikut Azovstal, bastioni i fundit i forcave mbrojtëse ukrainase brenda qytetit.

Ai theksoi se ushtria ruse është ende duke rrethuar zonën dhe Ukraina po flet me partnerët për të negociuar një korridor evakuimi.

Ai u bëri thirrje gjithashtu ambasadorëve nga të gjitha vendet, përfshirë Shtetet e Bashkuara, të kthehen në ambasadat e tyre në Kiev. /Telegrafi/