Kriza e lirës turke, presidenti Erdogan premton se do ta ulë inflacionin

Presidenti i Turqisë, Recep Tayyip Erdogan ka deklaruar se në të kaluarën ka arritur që ta ulë inflacionin për rreth 4 për qind dhe se këtë gjë do të arrijë ta bëjë sërish, teksa çmimet vjetore janë rritur për 21 për qind, për shkak të politikave agresive të tij, që kanë çuar në rënien e vlerës së lirës.

Erdogani tha se politika e re, e bazuar në nivele të ulëta të interesit, ishte pjesë e “luftës së suksesshme për pavarësi ekonomike”, por shumica e ekonomistëve kanë thënë se këto politika janë të gabuara dhe parashikojnë se inflacioni do të shkojë përtej shifrës prej 30 për qind gjatë vitit të ardhshëm.

Javën e kaluar, lira turke arriti rekordin më të ulët kundrejt dollarit amerikan. Gjatë këtij viti, monedha ka humbur rreth 55 për qind të vlerës së saj, përfshirë 37 për qind të vlerës e ka humbur vetëm gjatë 30 ditëve të fundit.

Dje, Erdogan ka përsëritur qëndrimin e tij se normat e interesit shkaktojnë inflacion, duke shtuar se ai nuk të lejojë që turqit të shkatërrohen si pasojë e normave të larta të kredive.

Lexo po ashtu Pas krizës ekonomike dhe zhvlerësimit të lirës - Erdogan rrit pagën minimale për 50 për qind

“Herët ose vonë, siç e kemi ulur inflacionin për 4 për qind kur unë erdha në pushtet, do ta ulim sërish. Do Zoti, së shpejti inflacioni do të filloi të bie”, tha Erdogan.

Më 2011, inflacioni kishte rënë për rreth 4 për qind, përpara se të fillonte të rritej gradualisht nga viti 2017. Në nëntor të këtij viti, inflacioni u rrit nga 3.5 në 21.3 për qind.

Më 16 dhjetor, presidenti turk njoftoi se do të rrisë pagën minimale për 50 për qind. Kjo lëvizje pritet që të rrisë inflacionin e përgjithshëm të çmimeve të konsumit me 3.5 deri në 10 pikë të përqindjes. Shumë qytetarë në Turqi kanë thënë se rritja e pagave nuk do të mjaftojë, pasi çmimet e jetesës janë rritur shumë.

Për shkak të presionit nga Erdogani, Banka Qendrore e Turqisë ka ulur normat e interesit që prej muajit shtator. Ai ka argumentuar se ky model do të rrisë eksportet, do të nxisë punësimet, investimet dhe rritjen ekonomike. /REL/