Kompania italiane e makinave Lancia po rilind si një markë vetëm për vetura elektrike

Lancia, kompania italiane e makinave në pronësi të Stellantis së bashku me Fita, Chrysler, Citroën, Vauxhall dhe Peugot, po ringjallet si një markë e makinave elektrike.

Kompania njoftoi planet për të prodhuar tre automjete elektrike midis vitit 2024 dhe 2028: një Ypsilon i ri, Delta e re, dhe një “produkt kryesor” i pa emëruar, transmeton Telegrafi.

Marka gjithashtu po sjell një logo të re, e teta në historinë e saj të gjatë 116-vjeçare, e cila i referohet dizajnit të saj të vitit 1957.

Deri në vitin 2028, plani është që Lancia të shesë ekskluzivisht automjete elektrike. Por, siç vëren Electrek, kompania shet vetëm një makinë të vetme (Ypsilon) në një treg të vetëm (Itali). Pra, nuk duhet të jetë shumë e vështirë të heqësh dorë nga shitjet e makinave të saj me motorë me djegie.

Krahas planeve të saj për EV dhe logos së re, Lancia ka zbuluar gjithashtu një gjuhë të re dizajni që thotë se do të udhëheqë krijimin e tre makinave të ardhshme.

Kompania ka ndërtuar një skulpturë fizike për të shërbyer si një “manifest tredimensional” i këtyre parimeve të projektimit.

Drejtori i Përgjithshëm i Lancia-s, Luca Napolitano, e quan skulpturën e cila është quajtur “Lancia Pu+Ra Zero” një “vepër arti në të cilën e kaluara dhe e ardhmja janë në kontakt të vazhdueshëm, në të cilën eleganca është e balancuar me frymën radikale të formave”.

Me sa duket “Pu+Ra” është shkurtim i “Pure and Radical”. /Telegrafi/