LAJMI I FUNDIT:

Koleksion të pikturave, veturë Tesla dhe aksione milionëshe – pasuria e kryetarit të kryeqytetit Përparim Rama

Koleksion të pikturave, veturë Tesla dhe aksione milionëshe – pasuria e kryetarit të kryeqytetit Përparim Rama

Koleksion të pikturave në vlerë prej 4 milionë eurove, veturë Tesla dhe aksione të investuara në kompani ndërkombëtare, kjo është vetëm përbërja e pasurisë e të parit të Prishtinës, Përparim Rama.

Rama, i cili ishte zgjedhur kryetar i kryeqytetit, në deklarimin e pasurisë në Agjencinë Kundër Korrupsionit ka të deklaruar 14.55 milionë euro pasuri të paluajtshme, si pronësi e përbashkët dhe e deklaruesit, shkruan Telegrafi.

I pari i prishtinaseve, thotë se posedon koleksion të mbi 400 pikturave si trashëgimi familjare në vlerë prej 4 milionë eurove. Po ashtu, si pasuri të luajtshme ka veturë Tesla Model X, të blerë në vitin 2017, në vlerë prej 83 mijë e 600 euro.

Ai po ashtu thotë se posedon aksione në kompani të ndërkombëtare në vlerë prej 4.46 milionë euro.

“Në të gjitha bizneset, deklaruesi ka paraqitur kërkesë për pezullim nga pozita e drejtorit, andaj menjëherë kur të përfundohen si proces do t’ia paraqesë Agjencisë në deklarimin e radhës”, thuhet në arsyetimin e deklarimit.

Rama thotë se ka 41,500 euro para të kursyera në emër të tij, kurse 5 mijë euro në emër të bashkëshortes.

Për sa i përket detyrimeve financiare, ai raporton se ka rreth 5.8 milionë euro borxhe ndaj bankave, me arsyetimin blerje të pronave – banesa dhe objekte.

Nga të hyrat vjetore, Rama thotë se merr pagë, qira dhe dividentë. Në emër të pagës, ai raporton se ka marr 1,436 euro, për dy banesa të lëshuara me qira në Londër ka marr 6,193 euro, kurse në emër të dividentës ka marr 7 mijë euro. /Telegrafi/