Klinsmann identifikon tre lojtarë kyç të Interit dhe pikën e dobët të Man Cityt

Ish-sulmuesi i Interit, Jurgen Klinsmann beson se Alessandro Bastoni, Nicolo Barella dhe Lautaro Martinez do të jenë lojtarët kryesorë të Nerazzurrëve në finalen e Ligës së Kampionëve kundër Manchester Cityt, të cilët kanë një pikë të dobët në krahë.

Ish-reprezentuesi gjerman parashikoi finalen e Ligës së Kampionëve të javës së ardhshme ndërmjet gjigantëve të Serie A dhe kampionëve të Ligës Premier në një intervistë me mediumin La Gazzetta dello Sport.

“Ndihem si çdo Interist tjetër, por ka një ndryshim. Do ta shikoj ndeshjen nga Seuli, puna më ka sjellë këtu”, ka thënë fillimisht Klinsmann.

Lexo po ashtu Mancini flet për finalen mes Interit dhe Man Cityt në Ligën e Kampionëve

Nerazzurrët kanë humbur 11 ndeshje në Serie A këtë sezon dhe jo shumë prisnin që djemtë e Simone Inzaghit të arrinin në finalen e Stambollit këtë sezon. Në mesin e tyre ishte edhe Klinsmann, i cili aktualisht është në krye të kombëtares së Koresë së Jugut.

“Arritja në çerekfinale tashmë dukej një objektiv i madh, por kush do ta priste finalen? Tani gjithçka mund të ndodhë, Manchester City është fenomenal, por Interi nuk ka asgjë për të humbur dhe ky është pothuajse një avantazh”.

“Interi do të ketë nevojë për identitet dhe një ndjenjë përkatësie. Kjo është arsyeja pse unë besoj te italianët, veçanërisht te Alessandro Bastoni dhe Nicolo Barella”.

“Nuk është rastësi që futbolli italian ka ecur lart në garat evropiane pas dështimit për t’u kualifikuar në Kupën e Botës. Ishte një reagim krenar”.

A ka pika të dobëta City i Pep Guardiolas?

“Çdo ekip ka. Mendoni vetëm për Barcelonën e Pepit të vjetër, e cila, me kalimin e kohës, u shpërbë veçanërisht në krahë. Mendoj se Inzaghi do të gjejë pikat e dobëta të Cityt. Ata do të kenë shanse dhe do të duhet t’i shfrytëzojnë sa më shumë”.

Finalja në Stadiumin Olimpik Ataturk në Stamboll do të jetë gjithashtu një takim mes dy sulmuesve më të mirë në Evropë këtë sezon, Erling Haaland dhe Lautaro Martinez.

“Haaland është një numër 9 i jashtëzakonshëm, ai do të prishte një autobus, por Lautaro ka evoluar dhe nuk është shumë prapa. Ai është në të njëjtin nivel me sulmuesit më të mirë”.

‘El Toro’ me siguri do të startojë, por ende ka dyshime për partnerin e tij në sulm. A do të shkojë Inzaghi për Edin Dzekon apo Romelu Lukaku?

“Ka shumë shqetësime se cili sulmues do të startojë. Ndoshta është më e rëndësishme se kush do ta përfundojë lojën. Dzeko mund të startojë, por Lukaku mund të jetë shkatërrues nga minuta e 60-të”, përfundoi legjenda gjermane. /Telegrafi/