I lindur në Stuttgart më 1967, Jurgen Klopp fillimisht kishte synime të tjera për jetën – dëshironte të bëhej mjek. Megjithatë, rezultatet e dobëta në nivelin A i treguan se kjo rrugë nuk ishte për të. Një koment ironik nga mësuesi i tij – “shpresoj të funksionojë me futbollin, përndryshe nuk po të duket mirë” – e bëri që të kthehej sërish drejt fushës së gjelbër.
Karriera e tij nisi si futbollist amator, ndërsa punonte në një dyqan. Vetëm në vitin 1990 nënshkroi me Mainz, klub ku luajti për 11 vjet. Pas tërheqjes nga futbolli në vitin 2001, Klopp mori drejtimin e ekipit dhe e udhëhoqi në Bundesligë, duke e transformuar nga një skuadër e zakonshme në një konkurrente serioze.
Suksesi i tij te Mainz tërhoqi vëmendjen e Borussia Dortmund, të cilët e emëruan trajner në vitin 2008. Me ta, Klopp fitoi dy kampionate, një Kupë të Gjermanisë, dy Superkupa dhe arriti deri në finalen e Ligës së Kampionëve. Në vitin 2015, pas largimit të Brendan Rodgers, Liverpool vendosi ta besonte drejtimin e skuadrës te gjermani – dhe vendimi rezultoi i shkëlqyer.
Nën drejtimin e Klopp, Liverpool fitoi Ligën e Kampionëve, Ligën Premier dhe trofe të tjerë të rëndësishëm, duke rikthyer lavdinë në “Anfield”. Ai nuk u bë vetëm një trajner i suksesshëm, por një figurë ikonike për klubin dhe tifozët.
Në një intervistë për Liverpool TV, Klopp u pyet për mendimin e tij mbi futbollistin më të madh të të gjitha kohërave. Edhe pse kishte idhull mbrojtësin gjerman Karlheinz Forster gjatë fëmijërisë, zgjedhja e tij për më të madhin ishte braziliani legjendar, Pele.
“Babai im më thoshte gjithmonë: ‘Pavarësisht çfarë thonë njerëzit, Pele është më i madhi’. E takova në Kupën e Botës 2006 dhe u djersita si i çmendur. Nuk jam tipi që emocionohet lehtë, por në atë moment isha shumë i ndrojtur. Për mua, më i miri në histori është Pele”, tregoi Klopp.
Pele është ende një emër që mbetet në majë të historisë së futbollit. Si fituesi më i ri i Kupës së Botës dhe golashënuesi më i mirë i Brazilit, ai është simbol i madhështisë. Klopp, si shumë të tjerë që e kanë parë të luajë, nuk ka dyshime: legjenda braziliane mbetet lojtari më i mirë që ka shkelur ndonjëherë fushat e futbollit. /Telegrafi/
