Jepet vendimi për Fredi Belerin, lihet në burg deri në gjykimin e tij për akuzën e blerjes së votave

Gjykata e Posaçme GJKKO ka caktuar masën e sigurisë “Arrest me burg” për Fredi Belerin dhe bashkëpunëtorin e tij Pandeli Kokaveshi.

Gjyqtarja Atalanta Zeqiri në vendimin e marrë në Dhomë Këshillimi vendosi të pranonte kërkesën e Prokurorisë së Posaçme (SPAK), që Fredi Beleri të gjykohet në burg për akuzën e blerjes së votave.

Në përfundim të seancës avokati i Belerit e cilësoi vendimin si të pa bazuar në prova, pasi sipas tij Beleri nuk ka pasur asnjë kontakt me të infiltruarin e policisë.

Lexo po ashtu Arrestimi i Belerit, Dendias me mision në Bruksel, takon Xhaçkën dhe ministrat e jashtëm të BE-së

Beleri do të vijojë të mbahet në ambientet e paraburgimit në Tiranë, ndërkohë që në pikëpyetje mbetet nëse ai do të mund ta marrë mandatin si kryebashkiak i zgjedhur i Himarës.

Beleri së bashku me anëtarin e shtabit të tij elektoral, Pandeli Kokaveshi, i cili nuk ishte i pranishëm në seancë pasi ndodhet në spital për shkak të gjendjes shëndetësore, akuzohen për shit-blerje votash.

Në fletën e arrestit të lëshuar ndaj Belerit theksohet se ai u ndalua në flagrancë duke blerë vota, ndërkohë që në dosjen e prokurorisë thuhet se blerja e votave është kryer nga Kokaveshi në ambientet e tualetit të një lokali në mesditë dhe jo në momentin e arrestimit. Votat sipas policisë iu blenë të infiltruarit të grupit hetimor. /Telegrafi/