A janë lotët artificialë dhe pikat e tjera të syve të sigurta për t’u përdorur çdo ditë?

Përdoren kur sytë kruhen ose lotojnë, si dhe për alergjitë

Zakonisht mund të merren pa recetë dhe falë tyre mund të shpëtojmë shpejt nga thatësia dhe acarimi i syve. Megjithatë, a janë lotët artificialë dhe pikat e tjera të syve të sigurta për t’u përdorur çdo ditë?

Ne shpesh kërkojmë pika për sy, në situata kur janë të skuqur, të përflakur ose të thatë. Disa pika për sy janë të sigurta për përdorim afatgjatë, ndërsa të tjerat duhen shmangur plotësisht, thonë mjekët dhe theksojnë se duhet të përdorni preparate në të cilat shkruan “pa konservues”, në mënyrë që sytë të mos irritohen më shumë.

Kur duhet të përdorni lotët artificial dhe kur për alergji

Nëse vazhdimisht shikojmë në ekran, është vërtetuar se ne i mbyllim sytë një e treta deri në gjysmën herë më pak se normalja, sipas Akademisë Amerikane të Oftalmologjisë, transmeton Telegrafi.

Pa “lubrifikimin” e vazhdueshëm të syve, ata do të fillojnë të thahen, gjë që është shumë e pakëndshme.

Lotët artificialë përdoren për të lagur sytë kur thahen, lodhen ose acarohen. Ata ndikojnë në reduktimin e inflamacionit të shkaktuar nga syri i thatë dhe ndihmojnë trupin të prodhojë më shumë lot.

Pikat e syve nuk do të dëmtojnë sytë, kështu që ne mund t’i përdorim çdo ditë”, thotë doktoresha Ashley Brissett, shkruan Liv Strong.

Sa i përket pikave të alergjisë, ato përmbajnë antihistamina për të lehtësuar simptomat e alergjisë. Është më mirë t’i përdorni ato si një zgjidhje afatshkurtër dhe jo afatgjatë. Nëse ndjejmë nevojën për t’i përdorur për më shumë se një ditë, duhet të konsultohemi me një mjek për të zgjidhur problemin në mënyrën e duhur.

Pika sysh për të lehtësuar skuqjen

Shumë prej nesh i kanë këto pika në kabinetin tonë të ilaçeve, por ja një gjë për të hedhur jashtë: “Unë nuk rekomandoj asnjë pikë syri që premton të heqë qafe skuqjen. Ato kanë një përbërës që e bën skuqjen të kthehet kur të ndaloni përdorimin. Nuk janë të sigurta për përdorim afatgjatë, thekson Dr. Brisset dhe shton se ka shumë arsye pse sytë mund të jenë të skuqur (irritim, alergji) dhe kjo është arsyeja pse është e rëndësishme të flisni me një mjek okulist dhe bëni një ekzaminim për të gjetur shkakun rrënjësor.

Si të vendosni pikat në mënyrë korrekte

Këto preparate janë sterile derisa të hapen dhe më pas është e nevojshme të respektohet data e skadencës. Gjatë aplikimit kuptohet që duart duhet të jenë të pastra dhe është mirë që pikat të vendosen në pozicion të shtrirë ose me kokën të kthyer mbrapa. Tërheqim qepallën e poshtme me dorën tonë, pikojmë, mbyllim sytë, e përkulim pak kokën përpara dhe presim disa minuta. Të njëjtën procedurë e përsërisim edhe me syrin tjetër. /Telegrafi/